८० वर्षीया हजुरआमा उत्कृष्ट अभिभावक
बर्दिबास : महोत्तरीको बर्दिबास नगरपालिका ३ गौरीडाँडाकी ८० वर्षीया विन्दा सुवेदीले उत्कृष्ट अभिभावकको सम्मान पाएकी छिन् । जनता माध्यमिक विद्यालय गौरीडाँडाले आाफ्नो ४३ औं बार्षिकोत्सव तथा अभिभावक दिवसको असरमा उनलाई दोसल्ला ओढाई सम्मान पत्र समेत प्रदान गरिको हो ।
११ बर्षीया नातिनी अनुपमालाई अनुशासित बनाएर समयमा विद्यालय पु¥याउन भुमिका खेलेको भन्दै उनलाई सम्मान गरिएको विद्यालय व्यवस्थान समितिका अध्यक्ष राजन ढुङ्गनाले बताए । उनले भने, ‘पाँच सय बढी अभिभावकले बच्चालाई पढाउने यस विद्यालयमा विन्दा सुवेदीलाई असल अभिभावक छानिएको हो ।’ विन्दाकी नातिनी कक्षा ५ मा पढ्छिन् । कार्यक्रममा विद्यालयलाई सहयोग गर्ने शिक्षक, अभिभावक, शिक्षा प्रेमीलाई समेत सम्मान गरिएको थियो ।
‘विद्यालयको भरमा मात्रै बच्चा पढिहाल्छ भनेर छोड्नु हुदैंन,’ सम्मान थाप्दै विन्दाले भनिन्, ‘बुढेसकालमा सम्मान पाए । खुशी लाग्यो ।’ महोत्तरी ३ प्रतिनिधिसभा सदस्यमा निर्वाचित विनाविभागीय मन्त्री समेत रहेका गिरिराजमणी पोखरेलले सम्मान पत्र प्रदान गरेका थिए । बालबालिकाको भविष्य निर्माणमा अभिभावकको महत्वपूर्ण भूमिका हुने मन्त्रि पोखरेलले बताए । ‘शिक्षा चुनौतीलाई सामना गर्ने हतियार हो । शिक्षाले समाजलाई परिवर्तन गर्छ’ उनले भने ।
जनता माध्यमिक विद्यालय प्रदेश २ कै सुविधा सम्पन्न सामुदायिक विद्यालयको सूचीमा पर्छ । विद्यालयमा बालीविज्ञान तथा पशुविज्ञानको प्राविधिक शिक्षा समेत संचालन गरिएको छ । प्रधानाध्यापक नेत्र रमतेलका अनुसार २८ जिल्लाका विद्यार्थीहरु पठन पाठन गर्ने विद्यालयमा अंग्रेजी माध्यमा पढाईन्छ ।