सुनसरीमा समानुपातिकमा एमाले पहिलो

धरान : सुनसरीका चार निर्वाचन क्षेत्रमध्ये प्रतिनिधिसभामा एक सिट मात्र जितेको एमाले समानुपातिकमा पहिलो पार्टी बनेको छ। एमालेले खसेको सदरमत ३ लाख १० हजार ६ सय १४ मध्ये प्रतिनिधिसभामा एक लाख १६ हजार ४ सय २ मत प्राप्त गरी समानुपातिकमा बढी मत प्राप्त गरेको छ। एमालेले प्रदेशतर्फको समानुपातिकमा पनि सुनसरीमा सबैभन्दा बढी मत प्राप्त गरेको छ। आइतबार सम्पन्न मत परिणामअनुसार एमालेले प्रदेशतर्फको समानुपातीकमा एक लाख १७ हजार ७ सय ९५ मत प्राप्त गरेको छ।

कांग्रेसले प्रतिनिधिसभा समानुपातीकमा एक लाख १२ हजार ४ सय ३८ मत र प्रदेशमा एक लाख २ हजार २सय ९४ मत प्राप्त गरेको छ। माओवादी केन्द्रले प्रतिनिधिसभामा १९ हजार ५ सय ९१ र प्रदेशसभामा २० हजार ७ सय ४७ मत प्राप्त गरेको छ। संघीय समाजवादी फोरमले सुनसरीमा प्रतिनिधिसभामा १६ हजार ८ सय २६ र प्रदेशसभामा १७ हजार ५ सय २६ मत प्राप्त गरेको छ। राजपाले प्रतिनिधिसभामा ६ हजार ३ सय ७० र प्रदेशसभामा ५ हजार ८ सय ३१ मत प्राप्त गरेको छ।

यहि मंसिर २१ गते सम्पन्न निर्वाचनबाट सुनसरी क्षेत्र नम्बर १ मा एमालेका जयकुमार राई निर्वाचित भएका छन्। क्षेत्र नम्बर २, ३ र ४ मा कांग्रेसका क्रमशः सिताराम मेहता, विजय गच्छदार र ज्ञानेनद्र कार्की निर्वाचित भएका छन्।

प्रदेशसभामा सुनसरी क्षेत्र नम्बर १ (क) मा एमालेका प्रदिप भण्डारी र (ख) मा भीम आचार्य विजयी भएका छन्। क्षेत्र नम्बर २ (क) मा एमालेका सर्बध्वज साँवा निर्वाचित भएका छन्। क्षेत्र नम्बर २ (ख) मा कांग्रेसका राजिव कोइराला विजयी भए। क्षेत्र नम्बर ३ (क) मा एमालेका लिलम बस्नेत विजयी भए भने। (ख) मा कांग्रेसका अगमलाल चौधरी विजयी भए। क्षेत्र नम्बर ४ (क) मा एमालेका जगदिशप्रसाद कुसैयत विजयी भएका छन् भने (ख) मा कांग्रेसका महम्मद ताहिर मियाँ विजयी भएका छन्।