क्रान्ति शाह
वीरगन्ज : प्रदेश नम्बर २ को सम्भावित राजधानीबारे बहस सरु भएको छ । जनकपुर र वीरगन्जमध्ये एकलाई राजधानी बनाउन पनि तानातान सुरु भएको हो ।
सरकारले प्रदेश नम्बर २ को अस्थायी राजधानीका रुपमा जनकपुरलाई प्रस्तावित गरिसके पनि पर्सा, बारा र रौतहटबाट निर्वाचित प्रदेशसभा सदस्यहरुले भने वीरगन्जलाई नै प्रादेशीक राजधानी बनाउनु पर्ने माग गरेका छन् ।
सामाजिक सन्जालहरुमा पनि यहाँका दल सम्बद्ध कार्यकर्ता र युवा युवती लगायतले प्रादेशिक राजधानी वीरगन्जलाई बनाउनुपर्ने आवाज उठाइरहेका छन् ।
प्रतिनिधी र प्रदेश सभा निर्वाचन ताका यहाँका प्राय सबै दलका उम्मेदवारहरुले आफनो चुनावी अपिल पत्र र संकल्प पत्रमा प्रदेश नम्बर २ को प्रादेशीक राजधानी वीरगन्जलाई बनाउने प्रतिबद्धता जनाएका थिए ।
पर्सा , बारा र रौतहटका सबै प्रदेशसभा सदस्यहरुले पनि वीरगन्जलाई प्रादेशिक राजधानी बनाउन प्रदेशसभाको बैठकमा आवाज उठाउने बताएका छन् ।
सरकारले जनकपुरलाई अस्थायी रुपममा मात्रै राजधानी तोके पनि प्रदेशसभाको पहिलो बैठकमा दुईतिहाइ बहुमतबाट मात्रै स्थायी राजधानीको निर्णय हुने भएकाले वीरगन्ज तोकिने प्रदेशसभा सदस्यहरुको जिकिर छ ।
संघीय समाजवादी फोरम नेपालका राष्ट्रिय उपाध्यक्ष एवम् पर्साको क्षेत्र नम्बर १ को ख बाट निर्वाचित लालबाबु राउत गद्धीले प्रादेशिक राजधानीका लागि प्रदेश नम्बर २ का आठ जिल्लामा वीरगन्ज सबैभन्दा उपयुक्त रहेको बताए ।
‘पर्साका नागरिकको चाहना पनि वीरगन्ज नै राजधानी बनोस भन्ने छ’, गद्धीले भने, ‘म पनि यहीँबाट निर्वाचित भएको छु, त्यसैले पर्साबासीको चाहना र भावना विपरित म छैन ।
राजपाका महामन्त्री एवम् बाराको क्षेत्र नम्बर ४ को ख बाट प्रदेशसभा सदस्यमा निर्वाचित जितेन्द्र सोनलले पनि प्रादेशिक राजधानीका लागि वीरगन्ज नै सबैभन्दा उपयुक्त रहेको बताए ।
अन्य ठुला दलका सांसदहरुले पनि वीरगन्जलाई नै प्रादेशिक राजधानी बनाउनुपर्ने अडान राखेका छन् । तराई–काठमाडौ जोड्ने द्रूत मार्ग, प्रस्तावित निजगढ अन्र्तराष्ट्रिय विमानस्थल पनि यहीँ बन्दै गरेको बताउँदै सांसदहरुले त्यसका लागि लविङ थाल्ने बताए ।
प्रतिक्रिया दिनुहोस !
