रामकृष्ण अधिकारी
काठमाडौं : प्रतिनिधिसभामा विघटित संसदका ६३ जना सांसदहरुले फेरि प्रवेश पाएका छन् । विभिन्न राजनीतिक दलका तर्फबाट निर्वाचन लडेकामध्ये ६३ जनाले फेरि प्रतिनिधि सभामा प्रवेश पाएका हुन् ।
विघटित संसदका कुल १६१ जना सांसदहरुले यसपटक केन्द्रीय संसद प्रतिनिधिसभाको चुनावमा प्रत्यक्षतर्फ प्रतिस्पर्धा गरेका थिए । यो पटकको निर्वाचनबाट जम्मा ९८ जना पूर्वसांसद बाहिरिइसकेका छन् ।
कुल उम्मेदवारको ३९ दशमलव १३ प्रतिशत सांसदहरु दोहोरिएर आएका हुन् । विघटित संसदबाट सबैभन्दा बढी एमालेका २३ जना सांसदले पुनः संसदमा प्रवेश पाएका छन् ।
जो संसदमा दोहोरिए
उसले कुल ३५ जना पूर्वसांसदहरुलाई प्रतिनिधिसभातर्फको प्रत्यक्षमा चुनाव लडाएको थियो । उनीहरुमध्ये २३ सांसदले चुनाव जितेका हुन् । तराई–मधेस लाोकतान्त्रिक पार्टीबाट यस दोस्रो संविधानसभामा प्रतिनिधित्व गरेका बृजेशकुमार गुप्ताले यसपटकको चुनाव एमालेको सूर्य चिन्हमा लडेकोले उनीसहित एमालेबाट २४ जनाले संसदमा प्रवेश पाएका छन् ।
यो एमालेले उम्मेदवार उठाएका मध्येबाट कुल ६५ दशमलव ७१ प्रतिशत प्रतिनिधित्व हो । एमालेबाट अध्यक्ष केपी ओली, वरिष्ठ नेताहरु माधव नेपाल, झलनाथ खनाल, लगायतका नेताहरु दोहोरिएर संसदमा आएका छन् ।
जसले चुनाव हारे
प्रत्यक्षमा चुनाव लडेपनि एमालेका १२ जना नेताहरुले संसदमा दोहोरिने अवसर गुमाएका छन् । एमाले नेताहरु वामदेव गौतम, ऋषिकेश पोखरेल, जर्नादन ढकाल, ताराकान्त चौधरी, डा. वंशीधर मिश्र, गरिमा शाह, मन्जुकुमारी चौधरी, राजकुमार गुप्ता, विचारीप्रसाद यादव, सत्यनारायण मण्डल, हरिप्रसाद उप्रेती र डा. राजन भट्टराई चुनाव लडे पनि संसदमा दोहोरिने अवसरबाट वञ्चित भएका छन् ।
माओवादीबाट दोहोरिनेहरु
माओवादी केन्द्रका तर्फबाट १६ जना सांसदहरु प्रतिनिधिसभामा दोहोरिने भएका छन् । माओवादीले विघटित संसदबाट २१ जनालाई प्रत्यक्षमा चुनाव लडाएको थियो । त्यसमध्ये उसका ५ जना नेताहरुले मात्र यसपटकको चुनाव हारेका छन् ।
माओवादीका तर्फवाट अध्यक्ष पुष्पकमल दहाल, नेताहरु कृष्णबहादुर महरा, जनार्दन शर्मा लगायतका नेताहरु दोहोरिएका छन् । अजयशंकर नायक, अशोकुमार मण्डल, उमेश कुमार यादव, रामसिंह यादव र सत्यनारायण भगत भने संसदमा देखिने छैनन् । यी ५ नेताले प्रत्यक्षतर्फको चुनाव जित्न सकेनन् ।
कांग्रेसबाट १८ जना दोहोरिए
कांग्रेसका भने १८ जनाले मात्र पून संसदमा प्रवेश पाएका छन् । फोरम लोकतान्त्रिक र अन्य पार्टीबाट काग्रेसमा प्रवेश गरी चुनाव लडेका १८ जनाले चुनाव जितेका छन् । कांग्रेसले ९० जनालाई चुनाव लडाएको थियो । अघिल्लो संसदमा प्रतिनिधत्व गर्ने पार्टीभन्दा भिन्न रहेर कांग्रेसबाट अबको संसदमा विजयकुमार गच्छदार, अभिशेकप्रताप शाह र मोहम्मद मुस्तक आलम यसपटक संसदमा देखिनेछन् ।
विघटित संसदमा प्रतिनिधित्व गरेका कांग्रेसका धेरै हस्ती नेताहरु यसपटक संसदमा देखिने छैनन् । वरिष्ठ नेता रामचन्द्र पौडेल, कृष्णप्रसाद सिटौला, विमलेन्द्र निधी, डा. रामशरण महत, अर्जुननरसिंह केसी, बलबहादुर केसी, रमेश लेखक, एनपी साउद, महेश आचार्यसम्मका काग्रेसका नेताहरु संसद्मा हुने छैनन । यी नेताहरुले यसपटकको चुनावमा हार ब्यहोरेका छन् ।
काग्रेसले आफनै पार्टीका पूराना ८२ जना र अन्यवाट पार्टी प्रवेश गरेका थप ८ जना पूर्व सांसदसहित ९० जनालाई यसपटक केन्द्रीय संसदमा प्रत्यक्षतर्फ टिकट दिएको थियो ।
राप्रपाका सबै पराजित
राप्रपाका विभिन्न घटकहरुबाट ५ जना पूर्व सांसदहरुले यसपटक प्रतिनिधिसभातर्फ चुनाव लडेका थिए । तर, कुनै नेता अबको संसदमा देखिने छैनन् । राप्रपाको घटकहरुबाट झापा ३ बाट मात्रै राजेन्द्र लिङ्देनले चुनाव जितेका छन् । तर, उनी यस अगाडीको संसदमा थिएनन् । राप्रपाका घटकहरुबाट कमल थापा, विक्रमवहादुर थापा, दिपक बोहोरा, विक्रम पाण्डे र सुनिलबहादुर थापा प्रतिनिधिसभाका लागि प्रत्यक्षमा चुनाव लडेका थिए । तर उनीहरु सबैजना पराजित भए ।
मधेसवादी तीन पराजित
मधेस केन्द्रित दलतर्फ संघीय समाजवादी फोरम, राष्ट्रिय जनता पार्टी लगायतबाट ६ जना पूर्व सांसदहरुले चुनाव लडेका थिए । तीमध्ये तीनजनाले चुनाव जितेर पुनः संसदमा प्रवेश पाएका छन् ।
अन्य तीनजना पराजित भएका छन् । मधेस केन्द्रित दलका तर्फबाट उपेन्द्र्र यादव, महेन्द्र्रराय यादव र लक्ष्मणलाल कर्णले मात्र संसदमा दोहोरिने अवसर पाएका छन् । अशोक राई, सर्वेन्द्रनाथ शुक्ल र नरसिंह चौधरीले पनि चुनाव लडेका थिए । तर, उनीहरु तीनैजना पराजित भएका छन् ।
त्यस्तै राष्ट्रिय जनमोर्चाकी दुर्गा पौडेल र नेपाल मजदुर किसान पार्टीका प्रेम सुवाल संसदमा दोहोरिएका छन् । तर, नेमकिपाबाटै प्रत्यक्षमा चुनाव लडेकी अनुराधा थापाले चुनाव जित्न नसकेपछि उनी संसदमा देखिने छैनन् ।
प्रतिक्रिया दिनुहोस !
