तपाईंले आफ्नो जितलाई कसरी हेर्नुभएको छ ?
मैले निर्वाचनअघि भनेकै हुँ, जित मेरै हो भनेर । धेरैले कोइराला परिवारको विरासत धान्ने व्यक्तिलाई जित्न कठिन छ भने । तर, मलाई जनताले विश्वास गर्छन् भन्ने नै थियो । हिजो सरकारमा सहभागी हुँदा मैले गरेका केही कामलाई जनताले पत्याए । पुनः सोहीअनुसारको काम गर्न अनुमोदन गरेका छन् ।
१३ लाख खर्चमा निर्वाचन जित्न कसरी सम्भव भयो ?
मैले निर्वाचनप्रति आमधारणा परिवर्तन गर्नुपर्छ भन्ने मान्यता राख्दै आएको छु । चुनाव लड्न पैसा खर्च गर्नुपर्छ र त्यसका लागि घरघडेरी बेच्नै पर्छ भन्ने छैन । आज घरघडेरी बेच्नेले भोलि जनताकै कोषमा ब्रह्मलुट गर्छन् । मैले त विराटनगरमा पत्रकार सम्मेलन गरी पत्रकारसँग पनि चुनाव खर्च मागेको हुँ । मलाई धेरै पत्रकारले सहयोग गरे । अरबमा काम गर्ने दाजुभाइ- दिदिबहिनीले पनि मलाई एक÷एक सय रुपैयाँ उठाएर सहयोग गरेका छन् । विदेशमा ५० डिग्रीको तापक्रममा श्रम गर्ने व्यक्तिले दिएको पैसाको उपयोग गर्नुपर्छ भनेर मैले अनावश्यक खर्च गरिनँ । कार्यकर्ता र शुभेच्छुक पनि आफ्नै पैसामा चिउरा, भुजा र चना खाएर मेरो लागि चुनाव प्रचारमा हिँडे । यसले पनि मलाई आर्थिक रुपमा सहयोग मिल्यो ।
वाम गठबन्धनले तपाईंलाई मन्त्रीका लागि सिफारिससमेत गरेको छ । तपाईंको दाबी पनि हो ?
मलाई दिएको जिम्मेवारी म आफ्नो दक्षता र विवेकले भ्याउन्जेल इमानदारीपूर्वक निर्वाह गर्ने प्रयास गर्छुु । अब बन्ने भनेको वाम गठबन्धनकै सरकार हो, मलाई पनि भूमिका दिइन्छ भने निश्चित रूपमा जिम्मेवारी सम्हाल्छुु । तर, फलानोलाई जितें भन्दै म मन्त्रीका लागि लिंडेढिपी कस्दिनँ ।
जनमतको सम्बोधन अब कसरी गर्नुहुन्छ ?
मलाई आएको मत पार्टीका समर्थकको मात्र होइन । हिजो म एउटा पार्टीको व्यक्ति थिएँ, अब म त्यो ठाउँको साझा प्रतिनिधित्व गर्ने व्यक्ति हुँ । जनताले दिएको विश्वास गुम्न दिनेछैन । मेरो मुख्य एजेन्डा जनताका समस्यालाई सम्बोधन गर्दै केन्द्रीय राजनीतिमा लबिङ गरी समाधानको बाटोतर्फ लाग्नु नै हुन्छ ।
आफ्नो निर्वाचन क्षेत्रमा मुख्य कुन कामलाई प्राथमिकता दिनुहुन्छ ?
मैले गर्नै पर्ने काममध्ये मुख्य सुकुम्बासी समस्या समाधान हो । म सुकुम्बासी आयोगको प्रमुख भएर यहाँ काम गर्दा संकलन गरेको घरधुरी लगतका फाइल मैले हेर्नुुपर्छ । पछि थपिएका विपन्न समुुदायका घरबारविहीन व्यक्तिको जीवनस्तर उकास्ने केही न केही योजना मैले ल्याउनै पर्छ । पछि परेका समुदायको आर्थिक सबलताका लागि काम गर्नुपर्छ । बाँकी प्राथमिकताका आधारमा म कुनै कन्जुुस्याइँ नराखी जनताको सेवामा खटिरहनेछु ।
‘महानगरभित्रका गाउँमा बिजुली बाल्नेछु'
केदार कार्की
प्रदेशसभा सदस्य, मोरङ ६ (२)
आफ्नो जितलाई तपाईंले कसरी लिनुभएको छ ?
स्थानीय जनताले हामीलाई जिताएका हुन् । केही नेता डा. शेखर कोइरालालाई हराउन लाग्नुुभयो । उहाँ जितेपछि पार्टीको सभापति र प्रधानमन्त्रीसमेत बन्नहुन्छ भनेर अवरोध गर्ने प्रयास भयो । तर, जनताबाट उहाँले पनि विश्वासको मत प्राप्त गर्नुभएको छ । यहाँको विकास र समृद्धिका लागि कांग्रेस नै चाहिन्छ भन्ने स्पष्ट जनमत रहेको देखिन्छ ।
जनताको विश्वासलाई कसरी व्यवहारमा बदल्नुहुन्छ ?
जनताको मतलाई खेर जान नदिने मेरो प्रण छ । मैले चुनाव जिते पनि नजिते पनि गर्ने जनताको सेवा नै हो । अहिले झनै जिम्मेवारी बढेको महसुस भएको छ । यस क्षेत्रका जनताका हरेक समस्या मैले बुुझेको छुु । सुुखदुःखमा साथ दिन तत्पर छु । कामलाई ठोस निष्कर्षमा पुर्याएरै विश्वासलाई व्यवहारमा बदल्नेछु ।
तपाईंको निर्वाचन क्षेत्रका मुख्य समस्या के हुन् ?
विराटनगर महानगरका केही वडामा बिजुली नै पुगेको छैन । अहिले पनि दर्जनौं घरपरिवार अन्धकारमा छन् । म अन्धकारलाई हटाउन चाहन्छु । अधिकांश सडक ग्राभेलसमेत भएका छैनन् । विकासको दृष्टिले पछाडि परेको बूढीगंगा गाउँपालिकालाई समृद्ध बनाउने मेरो अभियान हो ।
तपाईंको प्रतिबद्धता जनताले कसरी पत्याउँछन् त ?
पहिलो कुरा म जनतासँग मिलेर काम गर्न चाहन्छु । मलाई सबैले चिन्छन् । म मालिक भएर होइन, सहभागितामूलक मोडलबाट सहयोगीको भूमिका निर्वाह गरी समस्या समाधान गर्ने मध्यस्तकर्ताका रूपमा चिनिन चाहन्छु । नवीन कार्यको थालनी गर्दै छु । तीमध्ये वैशाखदेखि मेरो क्षेत्रका सबै सरकारी स्कुलमा अंग्रेजी शिक्षा अनिवार्य हुँदै छ । गाउँमा पनि चाहे सहरजत्तिकै विकास गर्न सकिन्छ भन्ने उदाहरण मैले पेस गर्नेछु ।
प्रस्तुति : मिलन बुढाथोकी
प्रतिक्रिया दिनुहोस !
