फारवेष्ट पशुपति युवा क्लब विजयी

धनगढी : बिहीबारदेखि तेश्रो संस्करणको ग्यालेक्सी पब्लिक स्कुल फारवेष्ट पशुपति कप फुटबल प्रतियोगीता धनगढीमा सुरु भएको छ । ५ लाखभन्दा बढी नगद पुरस्कार राशी भएको फुटबल प्रतियोगितामा आयोजक पशुपति युवा क्लबले विजयी सुरुवात गरेको छ । आयोजक फारवेष्ट पशुपति युवा क्लबले मदरल्याण्ड युवा क्लब जोनापुरलाई २–० ले हराएको हो ।

पहिलो हाफ गोल रहित बराबरीमा सकिएकोमा दोस्रो हाफमा दुवै गोल गर्दै आयोजकको टीम दोस्रो चरणमा प्रवेश गरेको हो । आयोजक फारवेष्ट पशुपति युवा क्लबलाई जिताउनका लागि भुपेन्द्र बम नरेन्द्र सिंहले एक एक गोल गरे । बमले ५८ मिनेटमा गोल गर्दै अग्रता दिलाए भने सिंहले ७५ औं मिनेटमा अर्को गोल थपे । प्रतियोगिताअन्तर्गत भोलीदेखि दुईवटा खेल हुनेछन् । १६ वटा टीमले भाग लिने प्रतियोगिता पुस ८ गतेसम्म चल्नेछ । नकआउट आधारमा सञ्चालन भएको प्रतियोगितामा कैलाली, कञ्चनपुर, दाङ, विभागीय टोली र भारतको एक टीम गरी १६ टीमको सहभागीता रहेको छ ।

यसअघि प्रतियोगिताको धनगढी उप–महानगरपालीका मेयर नृपबहादुर ओडले उद्घाटन गरेका थिए । प्रतियोगिताको मुख्य प्रायोजक काठमाडांैको ग्यालेक्सी पब्लिक स्कुल रहेको छ । प्रतियोगितामा विजेतालाई तीन लाख तथा उपविजेतालाई डेढ लाख र विभिन्न ५ वटा विधामा उत्कृष्ट हुने खेलाडीलाई १०÷१० हजार रुपैयाँ प्रदान गरिने भएको छ ।