कहिल्यै अनुहार नदेखाउने आखिर को हुन् 'मार्समेलो' ?

मार्समेलोको बुवाको परिचय ? - थाहा छैन । आमाको नाम ? - थाहा छैन ।श्रीमती वा गर्लफ्रेन्ड को हुन्, के गर्छिन् ? - थाहा छैन ।
आखिर को हुन् मार्समेलो ? - थाहा छैन ।बस्, मार्समेलोबारे संसारलाई यत्ति थाहा छ, ‘हि इज अ फेमस सिङ्गर ।’

फेसबुक, ट्विटर वा इन्टरनेटका जुनसुकै इन्जिन ‘सर्च’ गरे पनि उनको असली अनुहार भेटिँदैन । युट्युबमा मार्समेलो टाइप गर्दा मुखौटो लगाएको युवक (युवती होइन ? ) देखापर्छ । उसको आवाज सुनिन्छ, अनुहार देखिँदैन । घरिघरि त लाग्छ, नाच्दानाच्दै उसको मुखौटो फुत्त भुइँमा खसे पनि हुने ! गीत नसकिँदासम्म खसखस भइरहन्छ, खास को हुन् मार्समेलो !

मार्समेलो इडिएम प्रोड्युसर र डीजे हुन् । ‘जोयटाइम’ उनको बहुचर्चित एल्बम हो । लाखौं दर्शकले उनको उक्त एल्बम निकै रुचाएका छन् । ८ जनावरी २०१६ मा रिलिज भएको ‘जोयटाइम’मा १० वटा ट्र्याक छन् । यो एल्बम बिलबोर्ड इलेक्ट्रोनिक्स डान्स एल्बमको पाचौं नम्बरमा पर्न सफल भएको थियो । त्यसो त उनका हरेक गीत दर्शकका लागि उत्तिकै प्यारा छन् । उनले सन् २०१७ मै ‘एलोन’ गीत निकाले । गीत यति चर्चित बन्यो कि युट्युबमा यसको भ्युअर नै डेढ करोड नाघिसकेको छ । यो गीत ‘बिलबोर्ड हट हन्ड्रेड’ को सूचीमा पर्न सफल पनि भयो ।

डीजेका रूपमा संसारभर परिचित छन्- मार्समेलो । उनको खास नाम क्रिस कमस्टक हो । ज्याक र जेडको गीतमा रिमिक्स भरेपछि मात्र विश्वभर उनको चर्चा सुरु भयो ।

उनी म्युजिक स्टारका एक सदस्य पनि हुन् । यी सेलिब्रिटी आफ्नो परिचय किन गुमनाम राख्न चाहन्छन्, त्यो थाहा छैन । मार्समेलो आफ्ना गीतहरूमा प्रायः सेतो लुगा र सेतो मुखौटासहित देखा पर्छन् । सानो कदको मान्छे, बाल्टिनजस्तो मुखौटो लाएर यताउता बरालिँदा कुनै चिरपरिचित ‘जोक्कर’ हिँडेजस्तै जस्तै लाग्छ- मार्समेलो । दर्शक झुमाउन म्युजिक भिडियोमा उनको अभिनय पनि उत्तिकै आकर्षक छ ।

बुधबार मध्यरात दरबारमार्गस्थित ‘डेजाभु क्लब’ तोडफोड भयो । मार्समेलो नेपाल आउने हल्ला थियो । त्यसैले, उनको प्रस्तुति हेर्न हजारौं तिरेर धेरैले टिकट लिएका थिए । तर, निर्धारित समयभन्दा ६ घन्टा ढिलो भइसक्दा पनि उनी स्टेजमा नआएपछि दर्शकको शंका बढ्न थाल्यो । आयोजकले मार्समेलो नआउने घोषणा गरेसँगै डेजाभुमाथि आक्रमण भयो । मार्समेलोले ज्वरोको कारण आफू आउन नसकेको, स्वास्थ्य पहिलो र महत्वपूर्ण रहेको भन्दै सामाजिक सञ्जालमा पोस्ट् गरे । केही समयदेखि उनले अमेरिका, चीन, दक्षिण कोरिया, भारतजस्ता देशमा आफ्नो प्रस्तुति दिँदै आइरहेका थिए । नेपालमा पनि आउने भएपछि उनका फ्यान मक्ख थिए । उनको प्रस्तुति हेर्न लालायित युवाको सपना धेरै समय टिकेन ।

यतिधेरै चर्चित भइसक्दा पनि उनी आफ्नो अनुहार देखाउन चाहँदैनन् । यो मुखौटोले उनलाई झनै चर्चित बनाएको छ । उनका निर्णय, जिज्ञासा र सोचाइ प्रायः सामाजिक सञ्जालबाट बाहिर आउँछन् । ट्विटरमा मात्रै उनका फलोअर झन्डै १० लाख छन्।

मार्समेलोलाई बेलाबेलामा विभिन्न व्यक्तिसँग जोडिन्छ र उनको परिचय निकालिन्छ । उनी मार्टिन गारिक्स नै हुन् भनेर समेत चर्चा गरियो । केही-केहीले उनलाई समभोगेल हुन सक्ने अनुमान पनि गर्छन् । त्यस्तै अरू पनि थुप्रै शंका छन् । उनलाई अमेरिकी डीजे क्रिस्टियन कम्स्टक हुन् भन्ने अनुमान पनि गरिन्छ । डटकम भनेर चिनिने कम्स्टक र मार्समेलोको स्टाइल एउटै भएकाले पनि दुवै व्यक्ति एकै हुन् भन्ने चर्चा हुन्छ ।

जुलाई ८, २०१७ का दिन इन्डियन नायिका उर्वसी रउटेलाले इन्स्टाग्राममा एउटा फोटो पोस्ट गरिन् । त्यो फोटोमा सबैको अनुहार प्रस्टै देखिन्छ । फोटोमा उर्वसी, क्रिस कम्स्टक, मोई सालिजी छन् र त्यो फोटो मार्समेलोलाई पनि ट्याग गरिएको छ । यसबाट पनि अनुमान लगाउन सकिन्छ, कतै मार्समेलो कम्स्टक नै त हैनन् ! तर, दाबी गर्न सकिने कुनै आधार छैन । खास को हुन् मार्समेलो भनेर ठम्याउन गाहै्र छ ।

मार्समेलो एउटा स्थापित र खतरनाक डीजेका रूपमा संसारभर परिचित भइसकेका छन् । उनको खास नाम क्रिस कमस्टक हो । उनको चर्चा त्यतिबेला भयो जतिबेला उनले ज्याक र जेडको गीतमा रिमिक्स भरे । त्यस्तै उनले लिक्स, जैज, ओके, स्लुसीजस्ता गायकसँग मिलेर पनि गीत गाइसकेका छन् । उनले विश्वचर्चित गायिका सेलेना गोमेजसँग मिलेर पनि गीत गाएका थिए । उनको आवाज मुखौटोबाट बाहिरसम्म आउँछ, अनुहार आउँदैन ।

स्वरका मात्र धनी होइनन्, मार्समेलो । विश्वका धनी व्यक्तिको नाम सार्वजनिक गर्ने फब्र्स पत्रिकाका अनुसार, उनी विश्वका सर्वाधिक महँगा डीजेमा पर्छन् । उनले यस वर्ष लगभग २१ अर्ब कमाएको फोब्र्सले जनाएको छ ।

उनी किन लगाउँछन् माक्स ? मुखौटो लगाएर प्रस्तुति दिने यी चर्चित गायक डेड माउस र डाफ्ट पंकबाट प्रभावित छन् । यी दुई डीजे पनि मुखौटो लगाएरै आफ्नो प्रस्तुति दिन्छन् ।

-एजेन्सीको सहयोगमा