जसले ओस्कार चुम्न सकेनन्

ओस्कार कमिटीको आँखामा आजसम्म पनि पर्न नसकेकी नायिका हुन्- स्कार्लेट जोहन्सन । फिल्म ‘लस्ट इन ट्रान्सलेसन’की नायिका जोहन्सनले आजसम्म कुनै पनि ओस्कार पाएकी छैनन् ।टम क्रुज हलिउडका निकै चर्चित कलाकार हुन् । उनका फिल्म युवा पुस्तामाझ मात्रै नभई सबैसामु उत्तिकै चर्चित छ । आफ्नो दशकौं लामो करियरमा यी हँसिला अभिनेताले आजसम्म थुप्रै गोल्डेन ग्लोब अवार्ड हात पारिसके । तर, ओस्कार अवार्ड भने अहिलेसम्म जितेका छैनन् । सन् १९८४ यता उनी सातवटा गोल्डेन ग्लोब अवार्डमा मनोनीत भइसके । तीमध्ये तीनवटा क्रुजले हात पारी सके ।

हलिउड सिनेमा इन्डस्ट्रीमा अर्का अभिनेता विल स्मिथले पनि यी दुवै अवार्ड हात पार्न सकेका छैनन् । उनी पनि कडा मेहनत गर्ने अभिनेताका रूपमा चिनिन्छन् । उनी गोल्डेन ग्लोबमा पाँच पटक र एकेडेमी अवार्डमा दुई पटक मनोनयनमा पर्न सफल भइसकेका छन् ।

ओस्कार कमिटीको आँखामा आजसम्म पनि पर्न नसकेकी अर्की नायिका हुन् स्कार्लेट जोहन्सन । फिल्म ‘लस्ट इन ट्रान्सलेसन’की नायिका जोहन्सनले आजसम्म कुनै पनि ओस्कार पाएकी छैनन् । त्यसैगरी गोल्डेन ग्लोबमा पनि उनी तीन वर्षसम्म लगातार चारवटा विधामा मनोनयनमा परे पनि पुरस्कार भने आजसम्म जित्न सकेकी छैनन् ।

बहुप्रतिभाशाली म्याडोनालाई हिरोइनको रूपमा हेरिँदैन । न त कुनै फिल्ममा गीत लेख्ने गीतकारको रूपमा उनलाई प्रशंसकले चिन्छन् । यद्यपि उनी विश्वप्रसिद्ध गायिका हुन् भन्नेमा दुई मत छैन । ओस्कारमा अहिलेसम्म एउटा पनि मनोनयनमा नपरे पनि उनी हालसम्म सातवटा गोल्डेन ग्लोबको मनोनयनमा परिसकेकी छिन् । यीमध्ये दुईवटा जितेकी छिन् । उनले सन् १९९६ मा बनेको फिल्म ‘इभिटा’ मा ‘बेस्ट ओरिजिनल सङ’को पुरस्कार जितिन् ।

प्याम ग्रियरले हरेक फिल्ममा उत्तिकै रोचक भूमिकामा अभिनय गरेकी छिन् । यद्यपि उनले हालसम्म ओस्कार त के गोल्डेन ग्लोबसमेत हात पार्न सकेकी छैनन् । उनी आफ्नो फिल्म ‘ज्याकी ब्राउन’मा मात्रै गोल्डेन ग्लोबको मनोनयन परेकी थिइन् । अर्की अभिनेत्री क्लेरी डेन आजसम्म एउटा पनि ओस्कारको मनोनयनमा परेकी छैनन् । तर, उनी पाँच पटक गोल्डेन ग्लोबमा मनोनीत भई चार पटक अवार्ड जितिसकेकी छिन् । उनले विशेषगरी टेलिभिजन सिरिजका लागि उक्त अवार्ड पाएकी हुन् ।

‘द डेभिल वेयर्स प्राडा’, ‘सिकारियो’लगायतका फिल्ममार्फत दर्शकमाझ लोकप्रिय बनेकी नायिका इमिली ब्लन्टको एकेडेमी अवार्ड शून्य नै छ । तापनि उनी गोल्डेन ग्लोबमा भने पाँच पटकसम्म मनोनयनमा परेकी छिन् । यीमध्ये फिल्म ‘जिडियोन्स डटर’का लागि उनले यो पुरस्कार जितेकी छिन् ।

हलिउडमा एक प्रतिष्ठित अवार्डको रूपमा रहेको गोल्डेन ग्लोब अवार्ड २०१८ का लागि मनोनयन सुरु भइसकेको छ । त्यसका लागि प्रतिभाशाली कलाकारहरू इम्मा स्टोन, मेरिल स्ट्रिप, डेनजेल वासिङ्टन र टम ह्याङसलगायत कलाकारहरू मनोनीत भइसकेका छन् । यद्यपि अवार्ड कस-कसले आफ्नो पोल्टामा पार्ने हुन् भन्नेबारे भने आगामी जनवरी ७ तारिखमा मात्रै थाहा हुनेछ ।

एजेन्सीको सहयोगमा