'जनताको भरोसा टुट्न दिन्नँ'

 जितलाई कसरी लिनुभएको छ ?

यो जितलाई जनताले दिएको ठूलो जिम्मेवारी सम्झेको छु । अब यो जिम्मेवारीलाई सफलतापूर्वक सम्पन्न गराउने अभियानमा केन्द्रित रहनेछु । जनताले गरेको भरोसालाई टुट्न नदिने हिसाबले काम गर्नेछु ।

तपाईंका निर्वाचन क्षेत्रका समस्या ?

कञ्चनपुरको निर्वाचन क्षेत्र नम्बर २ लाई मैले समस्याग्रस्त क्षेत्रका रूपमा हेरेको छु । यो क्षेत्रमा विकासका आधारभूत कुरासमेत छैनन् । यो क्षेत्रका ९० प्रतिशत बसोबास अव्यवस्थित छ । बाढीपीडित, नदी कटानी, आरक्षपीडित, भूमिहीन, सुकुम्बासी, मुक्त कमैयालगायत अव्यवस्थित बसोबास गर्न बाध्य छन् । यसलाई व्यवस्थित बनाउनु छ । यातायातको सुविधासँगै शिक्षा, स्वास्थ्य, खानेपानीलगायत व्यवस्थापन गर्नु छ । यस्तै, विकासका पूर्वाधारको सुरुवात गरेर अघि बढ्नुपर्ने देखिन्छ ।

अव्यवस्थित बसोबासलाई समाधान गर्ने योजना ?

यो क्षेत्रको सबभन्दा ठूलो समस्या अव्यवस्थित बसोबास हो । दशकौंदेखि जमिन भोगचलन गरेर बसोबास गर्दै आएका मानिसले पनि लालपुर्जा पाउन सकेका छैनन् । यसले नागरिक र राज्यलाई पनि समस्यामा पारेको छ । अव्यवस्थित बसोबासलाई व्यवस्थित गरेर लालपुर्जा दिने हो । जनताले घरबहाल कर, सम्पत्ति कर तिर्न थालेपछि राज्यको आम्दानी पनि बढ्छ । जनताले लालपुर्जा बैंकमा राखेर ऋण लिने र केही काम गर्न सक्ने अवस्था बन्छ । सबै तहका सरकारसँग सहकार्य गरेर समस्या समाधान गर्नुपर्छ ।

चुनावी प्रतिबद्धता पूरा गर्न सम्भव होला ?

हामीले चुनावका बेला जनतालाई पूरा गर्न नसक्ने कुनै प्रतिबद्धता गरेका छैनौं । झुटा आश्वासन दिएर जनतासँग भोट मागेकै छैनौं । जनतालाई विकाससँग जोड्ने प्रतिबद्धता गरेका छौं । ती वाचा पूरा गर्न रातदिन काम गर्नेछौं ।

कस्ता समस्यालाई प्राथमिकतामा राख्नुभएको छ ?

व्यवस्थित बसोबासपछि यस क्षेत्रका नागरिकलाई गुणस्तरीय स्वास्थ्य सेवा, शिक्षा एवं अन्य प्राविधिक र व्यावसायिक बनाएर लैजाने योजना बनाएको छु । जनतालाई विकाससँग जोड्नेछु । आरक्ष पीडितको समस्या पनि प्राथमिकतामा छ । प्रस्तुती :  विष्णुप्रसाद देवकोटा