जितपछि कस्तो अनुभव भइरहेको छ ?
यो रुकुमका जनता र मतदाताले गरेको निर्णय हो । जनताको मागअनुसार म उम्मेदवार भएको हुँ र जनताले नै विजयी गराएका हुन् । म सम्पूर्ण मतदाता र जनताप्रति आभारी छु ।
रुकुमका जनता र मतदातालाई के भन्नुहुन्छ ?
ठूलो आशा र अपेक्षासहित मलाई र संयुक्त वाम गठबन्धनलाई जिताएको छ । यसलाई एउटा चुनौतीको रूपमा लिएको छु । सम्पूर्ण मतदाता र जनताको आशालाई निराशा नबनाउने, मैले गरेका प्रतिबद्धता पूरा गर्न लागिपर्छु । म यस क्षेत्रका सबै मतदाताको प्रतिनिधि भएर काम गर्नेछु ।
यस क्षेत्रका लागि प्राथमिकताको विषय ?
अबको पाँच वर्ष के-के गर्ने भन्नेबारे निर्वाचन प्रचारक्रममा जनतामाझ संयुक्त वाम गठबन्धनका तर्फबाट प्रतिबद्धता-पत्र सबैको घर-घरमा पुर्याएका छौं । घोषणापत्रमा तोकिएका प्राथमिकता शिक्षा, स्वास्थ्य, पर्यटन विकाससँगै जिल्लाको अन्य भौतिक पूर्वाधारको निर्माण, रोजगारी सिर्जना र सामाजिक न्यायलाई प्रभावकारी कार्यान्वयन गर्न स्थानीय, प्रदेश र केन्द्रीय सरकारको सम्पूर्ण संयन्त्र परिचालन गरिनेछ । ‘समृद्ध रुकुम समाजवादको आधार’ यो नारा हाम्रो घोषणापत्रको मूल विषय र कार्यदिशा पनि हो ।
यसपटकको चुनावमा केही भिन्नता अनुभव भयो ?
०४८ सालको चुनाव क्रान्तिको तयारीको सन्दर्भमा थियो र त्यो मेरा लागि पहिलो अनुभव थियो । त्यसपछिका निर्वाचन संविधान निर्माणसँग गाँसिएका थिए । अहिलेको निर्वाचन संविधान कार्यान्वयन र समृद्धिसँग जोडिएको छ । चुनावमा मैले समृद्धिकै लागि प्रतिबद्धता व्यक्त गरेको छु । यसपटक जनतासँग अन्तरक्रिया गर्दै पोस्टरबिना कुनै हल्ला नगरी सामान्य रूपले चुनावी कार्यक्रम अगाडि बढायौं । खर्च पनि कम भयो ।
अब बन्ने सरकारको प्राथमिकता ?
जनताले वाम गठबन्धनलाई जे अपेक्षा गरेर अमूल्य मत दिएको छ त्यसको सम्मान गर्नुपर्छ । त्यो मूलतः राजनीतिक स्थायित्व, आर्थिक समृद्धि र पारदर्शिता हो । अब राजनीतिक स्थायित्व, आर्थिक समृद्धि, पारदर्शी ढंगले सरकार सञ्चालन, सुशासन, भ्रष्टाचारविरुद्ध अभियानका साथै सामाजिक न्याय स्थापित गर्छौं ।
सरकार र पार्टी कसले चलाउने विवाद हुँदैन ?
व्यक्तिगत आकांक्षीको भिडन्त हुन सक्छ तर पार्टी निर्णय र पद्धतिमा यसले असर पार्दैन । कसैको व्यक्तिगत चाहना हुन सक्छ तर मूल आवश्यकता र पार्टी निर्णय कार्यान्वयन हुने हो । त्यसले पार्टी निर्णयलाई कार्यान्वयन गर्नुपर्छ ।
प्रस्तुति : महेश केसी
प्रतिक्रिया दिनुहोस !
