‘सुरक्षा काबुमा रहँदै गोली चल्यो'
सुर्खेत : कालिकोटमा सुरक्षा अवस्था आफ्नो काबुमा रहँदै सुरक्षाकर्मीले हतारमा गोली चलाएको खुलासा भएको छ । एक जना म्यादी प्रहरीको ज्यान जाने गरी भएको घटनामा सुरक्षाकर्मीले ‘माथिको आदेश' नपर्खी गोली चलाएको खुलेको हो ।
आफूहरूले आदेश नदिँदै ड्युटीमा खटिएका सुरक्षाकर्मीबाट गोली चलेको दाबी जिल्ला प्रहरी प्रमुख डीएसपी सुवासचन्द्र बोहोराले गरेका छन् । निर्वाचनमा खटिँदाको ज्याला कम भएको गुनासो गर्न शुक्रबार जिल्ला प्रहरी कार्यालय पुगेका म्यादी प्रहरीमाथि सामान्य विवादमै प्रहरीले लाठीचार्ज गरेको थियो । लाठीचार्जपछि आक्रोशित बनेका म्यादीमाथि प्रहरीले एकाएक अन्धाधुन्द गोली चलाउँदा म्यादी प्रहरी विवेक ऐडीको ज्यान गएको थियो ।
जिल्ला सुरक्षा समितिका संयोजक प्रमुख जिल्ला अधिकारी र आफूले आदेश नदिँदै गोली चलेका कारण घटना हुन पुगेको डीएसपी बोहोराले बताए । प्रमुख जिल्ला अधिकारी बद्रीनाथ गैरेले भने यो घटनामा ‘ढुंगाले लागेर म्यादीको मृत्यु भएको' बताउँदै आएका छन् । उनले गोली चलेको नै अस्वीकार गर्दै आएका छन् ।
प्रदेश ६ का प्रहरी प्रमुख एआईजी रणबहादुर चन्दले पनि गोली चलाउन आफूहरूले कुनै आदेश नदिएको बताए । प्रहरीबाट फायर नै नभएको उनले दाबी गरे । घटनाका प्रत्यक्षदर्शीले भने प्रहरीले अन्धाधुन्द गोली चलाएको बताएका छन् । ‘घटनाको सत्यतथ्य बाहिर आइहाल्छ, छानबिन टोली पनि आउँदै छ', कालिकोटका प्रहरी प्रमुख डीएसपी सुवासचन्द्र बोहोराले भने, ‘हामीले आदेश दिएका थिएनौं, ड्युटीमा रहेको सिपाहीले हाम्रो आदेश कुर्नुपर्छ भन्ने पनि छैन । आत्मरक्षाका लागि उसले गोली चलाउन सक्छ, कसैको आदेश पर्खनु पर्दैन ।'
प्रहरीले गोली नै नचलाएको प्रमुख जिल्ला अधिकारी र प्रदेश प्रहरी प्रमुखको दाबी ।
अवस्था सामान्य हुँदाहुँदै प्रहरीले गोली चलाएर ज्यादती गरेको भन्दै स्थानीय आन्दोलनमा छन् । घटनापछि सदरमुकाम मान्म तनावग्रस्त छ । प्रदर्शन उग्र भएपछि स्थानीय प्रशासनले शनिबारदेखि कफ्र्यु जारी राखेको छ । प्रदर्शनमा नेत्रविक्रम चन्द (विप्लव) नेतृत्वको नेपाल कम्युनिस्ट पार्टीका कार्यकर्ताको घुसपैठ भएको र हिंसा भड्किनसक्ने भन्दै कफ्र्यु लगाइएको प्रमुख जिल्ला अधिकारी गैरेले बताए ।
नेकपाका जिल्ला तहका नेता–कार्यकर्ताले प्रदर्शनमा आफ्नो समर्थन रहेको र न्यायका लागि अन्तिमसम्म लड्ने अभिव्यक्ति सामाजिक सन्जालबाट सार्वजनिक गरेपछि स्थानीय प्रशासन थप सशंकित भएको छ । प्रजिअ गैरेले पीडितसँग वार्ता भइरहेको र अवस्था सामान्य बन्दै गएको बेला विप्लवका कार्यकर्ताको घुसपैठ भएको र हिंसा बढ्ने आशंकामा कफ्र्यू जारी नै राखिएको बताए ।
प्रदर्शनका कारण तीन दिनदेखि सदरमुकाम मान्म बजार बन्द छ । कर्णाली राजमार्गको कालिकोट खण्डमा यातायात अवरुद्ध छ । घटनाको छानबिनका लागि गृह मन्त्रालयका सहसचिव मानबहादुर विश्वकर्माको नेतृत्वमा उच्चस्तरीय छानबिन टोली गठन भएको छ भने मृतकका आफन्तलाई १० लाख रुपैयाँ क्षतिपूर्ति दिने निर्णय भएको छ । गृह मन्त्रालयका सहायक प्रवक्ता उमेश ढकालले उच्चस्तरीय छानबिन टोली आइतबार साँझ नै हेलिकप्टरमार्फत कालिकोट पुगिसकेको जानकारी दिएका छन् ।
स्थानीयवासीले मृतकलाई सहिद घोषणा र गोली चलाउने प्रहरी, जिल्लाका सीडीओ र डीएसपीलाई तत्काल कारबाही नभएसम्म शव नबुझ्ने अडान लिएका छन् । समस्या समाधानका लागि कालिकोट पुगेका क्षेत्रीय प्रशासक सुरेश प्रधानले छानबिन टोली कालिकोट पुगेपछि पीडितसँग वार्ता हुने जनाए । आफन्तले शव बुझेर आन्दोलन फिर्ता लिएपछि मात्र कफ्र्यु हट्ने उनले जानकारी दिए ।