गाउँपालिकाको केन्द्र निर्धारण गर्न मतदान

फिदिम : केन्द्र निर्धारण गर्ने विषयमा पाँचथरको फालेलुङ गाँउपालिकाका जनप्रतिनिधिबीच लामो समयसम्म सहमति जुट्न नसकेपछि मतदान गरी केन्द्र निर्धारण गरिएको छ । मंगलबार डाकिएको गाँउसभामा पनि जनप्रतिनिधहरुबीच केन्द्र राख्ने विषयमा सहमति जुट्न नसकेपछि केन्द्र निर्धारण गर्न निर्वाचन गरिएको थियो ।

गाउँपालिकाको केन्द्र राख्ने विषयमा नेपाली काँग्रेस र वाम घटकका (एमाले र माओवादी) निर्वाचित पदाधिकारीबीच सहमति जुट्न नसकेपछि मतदानबाट केन्द्रको टुंगो लगाइएको हो । राज्यको पुर्नसंरचना आयोगले जिल्लाबाट प्राप्त सुझावका आधारमा मच्छेबुङमा केन्द्र राख्नेगरी निर्णय गरेको भएपनि स्थानीय तहका जनप्रतिनिधिबीच स्थान टुंगो लगाउने विषयमा विवाद चुलिएको थियो ।

मंगलबार भएको मतदानमा फालेलुङ ३ स्थित थोकेपुङ डाँडामा केन्द्र राख्ने टुंगो लागेको हो । सोही वडाको मच्छेबुङ र थोकेपुङको विषयमा विवाद चुलिएको थियो । ८ वडा र कार्यपालिकामा निर्वाचित गरी ५१ जना पदाधिकारी रहेको उक्त गाउँपालिकाको केन्द्र थकेपुङमा राख्नुपर्ने अडान माओवादी केन्द्र र एमालेका तर्फबाट निर्वाचित जनप्रतिनिधिको थियो । नेपाली कांग्रेको तर्फबाट निर्वाचित प्रतिनिधिले मच्छेबुङमा केन्द्र राख्नुपर्नेमा अडान राखेका थिए । छलफलबाटै केन्द्रको टुंगो लगाउन प्रयत्न गरिए पनि सहमति नभएपछि मतदान गर्दा थकेपुङ केन्द्र रहनेको पक्षमा बढी मत परेको हो ।

४१ जनप्रतिनिधिले भागलिएको मतदानमा थकेपुङका पक्षमा २४ र मच्छेबुङको पक्षमा १७ मत खसेकोे गाउँपालिकाका प्रमुख सञ्चकुमार केरुङले जानकारी दिए । ‘सहमतिबाटै केन्द्रको टुंगो लगाउने प्रत्यन गरिएको हो,’ केरुङले भने, ‘कुनै हालतमा सहमति नजुटेपछि मतदानबाट टुंगो लगाउनुप¥यो ।’

पुनःसंरचना आयोगले स्थानीय तहको निर्वाचन भएको छ महिना भित्रमा सम्बन्धित स्थानीय तहका जनप्रतिनिधिको सहमत नभए सामान्य बहुमतले केन्द्र तोक्नसक्ने व्यवस्था गरेको छ । छ महिना भन्दा ढिलो भए जनप्रतिनिधिको दुई तिहाई बहुमतले मात्र केन्द्र सार्न वा तोक्ने सक्ने प्रावधान छ ।

पुस १४ गते निर्वाचन भएको छ महिना बित्ने भएपछि दुई तिहाई बहुमत चाहिने भएकाले मंगलबार भएको मतदानबाट सामान्य बहुमतले गाउँपालीकाको केन्द्र निर्धारण गरेको हो ।

यसअघि हिलिहाङ गाउँपालिकाको केन्द्र गोपेटार वा पञ्चमी कहाँ राख्ने भन्ने विषयको विवाद पनि मतदान प्रकृयाबाटै टुंगो लगाइएको थियो । फाल्गुनन्द गाँउपालिकाको केन्द्रको विषमा पनि विवाद चुलिएको छ । १४ गते डाकिएको गाँउसभाले विवाद टुंगो लगाउन गाँउपालिकाका प्रमुख अमर नेम्बाङले जानकारी दिए ।