भक्तपुर क्यान्सर अस्पतालमा चौबीसै घन्टा शल्यक्रिया
भक्तपुर : भक्तपुर क्यान्सर अस्पतालले शल्यक्रियासहितको विस्तारित स्वास्थ्य सेवा (ईएचएस) सुरु गरेको छ । अस्पताल व्यवस्थापन समिति अध्यक्ष लोकेन्द्रकुमार श्रेष्ठले चौथोपटक कार्यभार सम्हाल्दै उक्त सेवा सुरु भएको बताए ।
सेवा सुरु भएसँगै अस्पतालमा अबदेखि चौबीसै घन्टा शल्यक्रिया हुने अस्पतालका मेडिकल निर्देशक डा. ऋषिकेशनारायण श्रेष्ठले जानकारी दिए । ईएचएस सेवा सुरु भएपछि क्यान्सरका बिरामीले शल्यक्रिया गर्न महिना दिन कुर्नुपर्ने बाध्यता अन्त्य हुने विश्वास व्यक्त गरे ।
‘अहिले क्यान्सरका बिरामीले अप्रेसन गर्न एक महिनाको पालो कुर्नुपर्छ’। निर्देशक डा. श्रेष्ठले भने, ‘ईएचएस सेवा सुरु भएपछि हामी जहिले पनि अप्रेसन गर्छौं । अब बिरामीले महिना दिन कुर्नुपर्ने छैन । बिरामी तयार भएलगत्तै अप्रेसन गर्नेछौं ।’
उक्त सेवाको लागि अस्पतालले अत्याधुनिक मोडुलार अप्रेसन थिएटरसमेत सञ्चालनमा ल्याइसकेको छ । यससँगै अस्पतालमा अप्रेसन थिएटरको संख्या चारवटा पुगेको छ । साथै चारवटा थिएटर प्रयोग गर्न छ चिकित्सक एवं स्वास्थ्यकर्मीको टोली बनाइएको निर्देशक डा. श्रेष्ठले जानकारी दिए ।उनले ईएचएस सेवामा गैरक्यान्सर बिरामीको अप्रेसनसमेत गरिने जानकारी दिए ।
‘क्यान्सर अस्पताल भएकाले ओटीको ईएचएस सेवामा क्यान्सर बिरामीलाई प्राथमिकता नै दिन्छौं’, उनले भने, ‘गैरक्यान्सर बिरामीको अप्रेसनसमेत गर्छौं ।’ उनका अनुसार पित्तथैलीको पत्थर झिक्ने उपकरण क्यान्सर अस्पतालमा पनि उपलब्ध छ । निजी अस्पतालको भन्दा अत्यन्त न्यून शुल्कमा भक्तपुर क्यान्सर अस्पतालले पित्तथैलीको पत्थरको अप्रेसन गर्ने उनले जानकारी दिए ।
अस्पतालले परीक्षणको रुपमा गएको मंसिर १ गतेदेखि बहिरंग (ओपीडी) सेवाको विस्तारित स्वास्थ्य सेवा सञ्चालनमा ल्याएको थियो । अब ओपीडी सेवाको विस्तारित सेवालाई लागू गरिएको व्यवस्थापन समितिका अध्यक्ष लोकेन्द्रकुमार श्रेष्ठले घोषणा गरे ।
।
नेपाल अर्बुदरोग निवारण संस्थाको सिरहाको लहानमा भएको २७ औं केन्द्रीयसभामा संस्थाको अध्यक्षमा लोकेन्द्रकुमार श्रेष्ठ सर्वसम्मत भएका थिए । उक्त संस्थाका अध्यक्ष नै भक्तपुर क्यान्सर अस्पताल व्यवस्थापन समितिको अध्यक्ष हुने प्रावधान छ । सोही प्रावधानअनुसार श्रेष्ठले बिहीबारदेखि तीनवर्षे कार्यकालको लागि कार्यभार सम्हालेका छन् ।
नेपाल सरकार, रोटरी क्लव र भक्तपुरको स्थानीय तह तथा समुदायको सहयोगमा नेपाल अर्बुदरोग निवारण संस्थाले २०५६ सालदेखि भक्तपुर क्यान्सर अस्पताल सञ्चालन गर्दै आएको हो ।
==
प्रतिक्रिया दिनुहोस !
