सेलिब्रिटीका नयाँ वर्ष गन्तव्य
सधैं व्यस्त रहने बलिउड सेलिब्रिटी रमाइलो गर्नका लागि अवसरको खोजीमै रहन्छन् । क्रिसमस होस् या दिवाली, सेलिब्रिटीहरू एकै ठाउँमा आएर एकआपसमा खुसी साटासाट गर्ने गर्छन् । सन् २०१७ लाई बिदा गरेर सन् २०१८ लाई कसरी स्वागत गर्ने र यो अवसरलाई कसरी अविस्मरणीय बनाउने भनेर बलिउड सेलिब्रिटीमध्ये धेरैले आआफ्ना योजना तय गरिसकेका छन् । कतिपयले नयाँ वर्षलाई आफ्नै परिवार र साथीभाइसँग मनाउने भएका छन् भने धेरैले यो अवसरमा विदेशका विभिन्न ठाउँ घुमेर रमाइलो गर्ने सोच बनाएका छन् ।
बलिउडका चर्चित नायक आमिर खानले नयाँ वर्षमा पत्नी किरण रावसँग थाइल्यान्डमा बिताउने सोच बनाएका छन् । सोही अवसरमा उनले यशराज फिल्म्स्को नयाँ चलचित्र ‘ठग्स् अफ हिन्दुस्थान’को पनि छायांकन गर्ने भएका छन् । उक्त चलचित्रमा आमिरका साथमा अमिताभ बच्चनले पनि काम गरेका छन् ।
बलिउडका अर्का स्टार अक्षय कुमारले भने नयाँ वर्ष पत्नी टुइंकल खन्नाका साथमा अफ्रिकामा मनाउने भएका छन् । उताबाट फर्केपछि उनी आफ्नो फिल्म ‘पद्मन’को प्रचारप्रसारका काममा जुट्ने भएका छन् । हाल विभिन्न सिनेमाघरमा प्रदर्शन भइरहेको फिल्म ‘टाइगर जिन्दा हे’का कारण चर्चामा रहेका नायक सलमान खानले भने मुम्बईमै बसेर आफ्ना साथीभाइ, परिवार र नातेदारसँग नयाँ वर्ष मनाउने भएका छन् ।
नायिका करिना कपुरले पति नायक सेफ अलि खान र छोरा टइमुर अलि खानसँग नयाँ वर्ष युरोपतिर मनाउने भएका छन् । त्यसैगरी दीपिका पादुकोणले यो नयाँ वर्षमा बैंग्लोरमा रहेको आफ्नो परिवारलाई समय दिने भएकी छन् । उनीहरूसँगै बसेर उनले नयाँ वर्षमा रमाइलो गर्ने भएकी छन् ।
बलिउडमा कान्छी नायिकाका रूपमा चर्चा कमाएकी आलिया भट्ट भने यो नयाँ वर्षमा आफ्ना नजिकका साथीहरूसँग इन्डोनेसियाको बाली जाने भएकी छन् । उनको मिल्ने साथीहरूमध्येकै एक अर्को वर्षको सुरुमै विवाहबन्धनमा बाँधिने भएकाले बालीमा उनीहरूले ‘ब्याच्लरेट पार्टी’ पनि मनाउने भएका छन् ।
धेरैपछि फिल्ममा देखा पर्न लागेका नायक सञ्जय दत्तले भने आफ्नो नयाँ फिल्म ‘तोरबाज’को सुटिङ सेटमै नयाँ वर्ष मनाउने भएका छन् । उक्त अवसरमा उनलाई उनका परिवारका सदस्यले पनि साथ दिने भएका छन् । फिल्म ‘केदारनाथ’को छायांकनमा व्यस्त नायक सुशान्त सिंह राजपुतले यो नयाँ वर्ष न्युयोर्कमा मनाउने भएका छन् । नयाँ वर्षको रमझम सकाएर आएपछि उनी पुनः फिल्मको छायांकनमा लाग्ने भएका छन् ।
अनिल कपुरकी छोरी सोनम कपुर भने नयाँ वर्षको छुट्टी मनाउन लन्डन जाने भएकी छन् । त्यसैगरी कंगना रनावतले भने फिल्म ‘मनीकर्णिका’को सेटमा नै नयाँ वर्ष मनाउने योजना बनाएकी छन् । एजेन्सी
प्रतिक्रिया दिनुहोस !
