प्रधानमन्त्री देउवा र निर्वाचन आयोगका प्रमुख आयुक्त यादवबीच भेटवार्ता
काठमाडौं : प्रधानमन्त्री शेरबहादुर देउवाले निर्वाचन आयोगको परामर्शमा केही दिनभित्रै राष्ट्रियसभा सदस्य निर्वाचनको मिति घोषणा गर्ने बताएका छन् । प्रमुख निर्वाचन आयुक्त डा. अयोधीप्रसाद यादव र आयोगका पदाधिकारीसँग शुक्रबार भएको भेटमा उक्त जानकारी गराएको आयोगका प्रवक्ता दिनेशकुमार घिमिरेले बताए ।
राष्ट्रपति विद्यादेवी भण्डारीले पनि शुक्रबार राष्ट्रियसभा सदस्य निर्वाचन अध्यादेश प्रमाणीकरण गरेपछि आयोगका तर्फबाट निर्वाचनको मिति घोषणा गर्न सल्लाह दिएकी थिइन् ।
डा. यादवले प्रदेश प्रमुख नियुक्ति र प्रदेशसभा सदस्यको शपथ नलिएसम्म राष्ट्रियसभा सदस्यको निर्वाचनमा मतदाता हुन नसक्ने व्यहोरा प्रधानमन्त्री समक्ष अवगत गराएको घिमिरेले बताए ।
प्रधानमन्त्रीले प्रतिनिधिसभा तथा प्रदेशसभा सदस्य निर्वाचन निष्पक्ष, स्वतन्त्र र विश्वसनीय रूपमा सम्पन्न गराउन सफल भएकामा आयोग र यसका पदाधिकारीलाई धन्यवाद तथा बधाई ज्ञापन गरेका थिए ।
डा. यादवले पनि निर्वाचन सफल बनाउन सरकारले पु¥याएको सहयोगको प्रशंसा गर्दै प्रधानमन्त्रीसमक्ष बधाई ज्ञापन गरेको आयोगले बताएको छ ।
भेटका अवसरमा निर्वाचन आयुक्त इला शर्मा, नरेन्द्र दाहाल, ईश्वरीप्रसाद पौड्याल र सुधीरकुमार शाह पनि उपस्थित थियो । रासस