होलिकप्टर मार्फत सङ्खुवासभाको मतपत्र काठमाडौं लगियो

सङ्खुवासभा : सर्वोच्च अदालतको आदेश अनुसार आइतवार निर्वाचन आयोगले हेलिकप्टर मार्फत सङ्खुवासभाको मतपत्र काठमाडौं लगेको छ । निर्वाचनमा पराजित नेपाली कांग्रेसका प्रतिनिधसभा उम्मेदवार दिपक खड्काले प्रतिनिधि सभातर्फको पुनः मतगणनाको माग गदै सर्वोच्चमा रिट दायर गरेका थिए ।

सर्वोच्चको आदेश अनुसार निर्वाचनमा प्रयोग भएका मुचुल्का लगायत मतपत्र सहित सम्पूर्ण कागजात निर्वाचन आयोगले नेपाली सेनाको हेलिकप्टर मार्फत आयोगको कार्यालयमा लगेको प्रमुख जिल्ला अधिकारी शिवराज जोशीले जानकारी दिए । आयोगले जिल्ला निर्वाचन कार्यालयलाई मतपत्र सहितको कागजात पठाउन लिखित पत्र पठाएपछि निर्वाचनमा प्रयोग भएका सम्पुर्ण सामाग्री हेलिकप्टर मार्फत पठाइएको प्रजिअ जोशीले बताए । उनले सर्वोच्चको आदेश अनुसार निर्वाचन सामाग्री आयोगले अदालतमा पेश गर्ने बताए ।

प्रतिनिधि सभातर्फको मतगणनाको क्रममा आफ्ना मतहरुलाई बदर बनाइएको भन्दै पराजित उम्मेदवार खड्काले पुनः मतगणनाको मग गदै सर्वोच्चमा रिट दायर गरेको थिए । प्रतिनिधि सभातर्फ ३ हजार २ सय ५६ मत बदर भएको थियो । जिल्लाका प्रतिनिधिसभा, प्रदेशसभाको प्रत्यक्ष र समानुपातिकको मतपत्र आयोगले लगेको हो । सङ्खुवासभा जिल्लामा प्रतिनिधि सभातर्फ ६९ हजार २ सय ४६ मत खसेको थियो । प्रदेश सभा (क) मा ३३ हजार ४ सय ९६ र (ख) मा ३५ हजार ६ सय ९७ मत खसेको थियो । खड्का नेकपा एमालेका उम्मेदवार राजेन्द्रप्रसाद गौतमसँग पराजित भएका थिए । गौतमले ३२ हजार ७ सय ६९ मत ल्याएका थिए भने खड्काले ३१ हजार ६ सय ३९ मत ल्याएका थिए ।