रोनाल्डोको राज, महँगा नेमार

क्रिस्टियानो रोनाल्डो विश्व फुटबल महासंघ (फिफा) द्वारा प्रदान गरिने वर्षको सर्वोत्कृष्ट पुरुष फुटबल खेलाडी घोषित भए । सन् २०१७ मा विभिन्न प्रतियोगितामा गरेको उत्कृष्ट प्रदर्शनका आधारमा रोनाल्डोले ‘फिफा वर्ष खेलाडी’ पुरस्कार पाए । स्पेनिस ला लिगा क्लब रियल म्याड्रिडबाट व्यावसायिक फुटबल खेल्ने ३२ वर्षीय पोर्चुगिज खेलाडी रोनाल्डो पाँचौंपटक विश्वको उत्कृष्ट फुटबल खेलाडीको उपाधि चुमे ।

उक्त उपाधि स्पेनिस क्लब बार्सिलोनाका अर्जेन्टिनी खेलाडी लियोनल मेसीले पनि पाँचपटक नै जितेका थिए । यसपटक रोनाल्डोले मेसी र फ्रान्सेली क्लब पेरिस सेन्ट जर्मन (पीएसजी) का ब्राजिलियन खेलाडी नेमारलाई पछि पार्दै उक्त अवार्ड हात पारेका थिए । रोनाल्डोले सन् २०१६÷१७ मा रियल म्याड्रिडलाई घरेलु लिग र च्याम्पियन्स लिगको उपाधि दिलाउन महत्वपूर्ण भूमिका निर्वाह गरेका थिए । च्याम्पियन्स लिगको फाइनलमा रियल म्याड्रिडले इटालियन सिरिए क्लब युभेन्ट्सलाई ४—१ गोेलले हराउँदै रोनाल्डोले दुई गोलको योगदान गरेका थिए । त्यसअघिको सिजनको च्याम्पियन्स लिगको उपाधि पनि रियल म्याड्रिडले नै जितेको थियो । रोनाल्डोले यसअघि सन् २००८, सन् २०१३, सन् २०१४ र सन् २०१६ मा यो सफलता हात पारेका थिए । मेसी भने सन् २००९ देखि सन् २०१२ सम्म लगातार र सन् २०१५ मा विश्वको सर्वोत्कृष्ट फुटबल खेलाडीको अवार्ड जितेका थिए । रोनाल्डोले सन् २०१६÷१७ सिजनमा रोनाल्डोले रियल म्याड्रिडलाई स्पेनिस सुपर कपको उपाधि चुमाएका थिए ।

फिफा वर्ष खेलाडी मात्र होइन रोनाल्डोले लगातार दोस्रो वर्षको उत्कृष्ट फुटबल खेलाडीको रूपमा ‘बेलन डी ओर’ अवार्ड जिते । रोनाल्डोले पाँचौंपटक ‘बेलन डी ओर’ अवार्ड जितेका हुन् । संयोगनै मान्नु पर्छ रोनाल्डोले ‘बेलन डी ओर’ मा पनि मेसीलाईनै पछि पारे र मेसीसँगै अवार्ड संख्या बराबरी पुर्‍याए । मेसीले पनि यसअघि पाँचपटक ‘बेलल डी ओर’ अवार्ड जितेका थिए । सन् २०१६ मा पनि रोनाल्डोले मेसीलाई नै पछि पारेका थिए । यसमा पनि ब्राजिलियन नेमार तेस्रो भए । यसअघि रोनाल्डोले सन् २००८, सन् २०१३, सन् २०१४ र सन् २०१६ मा उक्त अवार्ड हात पारेका थिए । मेसीले भने सन् २००९ देखि सन् २०१२ सम्म लगातार र सन् २०१५ मा उक्त अवार्ड जितेका थिए ।

महँगा नेमार

मेसीसँगै बार्सिलोनाबाट व्यावसायिक फुटबल खेल्दै आएका ब्राजिलियन स्टार नेमारको चर्चा सन् २०१७ मा छुट्टै रह्यो । २५ वर्षीय नेमार बार्सिलोनाबाट कीर्तिमानी महँगो रकममा फ्रान्सेली क्लब पेरिस सेन्ट जर्मन (पीएसजी) मा ठूलो रकममा अनुबन्धित भए । पिएसजीले नेमारलाई १९ करोड ८० लाख पाउन्डमा अनुबन्ध गर्‍यो । यो रकम अहिले सम्मकै बढी हो । विश्वका महँगा फुटबलर बनेका नेमार अझै महंगो रकममा स्पेनिस क्लब रियल म्याड्रिड जाने चर्चा चलिरहेको छ ।