फोरम र राजपाका नेता भन्छन् : एमाले नेतृत्वको सरकारमा जानै हुँदैन
काठमाडौँ : संघीय समाजवादी फोरम र राष्ट्रिय जनता पार्टीका दोस्रो तहका नेताले वामगठबन्धनको सरकारमा सहभागी नहुने बताएका छन् ।
फोरमका अध्यक्ष उपेन्द्र यादव र राजपाका अध्यक्षमण्डल नेता राजेन्द्र महतो लगायत शीर्ष नेताले वाम गठबन्धनको सरकारमा सहभागी हुने कसरत गरिरहेका बेला दोस्रो तहका नेताले त्यसलाई इन्कार गरेका छन् ।
फोरम अध्यक्ष यादवको त एमाले अध्यक्ष केपी शर्मा ओलीसँग संवाद समेत भइरहेको छ । राजपा नेता महतोले जनकपुरम वाम गठबन्धनसँग सहकार्य गरेर जानुपर्ने कुरा सार्वजनिक रुपमा प्रकट गरिसकेका छन् ।
फोरम उपाध्यक्ष लालबाबु राउतले वर्तमान अवस्थामा फोरमले वाम गठबन्धनको सरकारमा सहभागी नहुने बताए । उनले संविधान संशोधनको मुद्दा सम्बोधन नभएसम्म फोरम वाम गठबन्धनको सरकारमा सहभागी नहुने उनले स्पष्ट पारे ।
‘संविधान संशोधन मुद्दाको जबसम्म सुनिश्चिता हुदैन, तबसम्म फोरम सरकारमा सहभागी हुँदैन,’ उनले भने । राउतले फोरम र राजपाले अहिले संघीय सरकारमा जान हतार गर्न नहुने पनि तर्क गरेका छन् ।
राजपा महासचिव मनीष सुमनले वाम गठबन्धनको सरकारमा कुनै पनि हालतमा राजपा सहभागी नहुने बताए । एमालेलाई अछुत पार्टीको संज्ञा दिँदै सुमनले वाम गठबन्धनको सरकार बन्नु भनेको मुलुकका लागि दुर्भाग्य भएको बताए ।
सुमनले वाम गठबन्धनको दुईतिहाइ आएको भएर मुलुकमा प्रेस स्वतन्त्रताको हनन हुने, दलीय लोकतन्त्र समाप्त भई एकतान्त्रिक व्यवस्था हुन सक्ने आंशका प्रकट गरे ।
सुमनले राजपा वाम गठबन्धनको सरकार बन्न नदिन भरमजदुर कोसिस गर्ने बताए । ‘हामी वाम गठबन्धनको सरकार नबनोस भन्नेमा लागेका छौ, सकेसम्म वाम गठबन्धन भत्काउन लाग्छौँ’, उनले भने ।
राजनीतकि मूल्य मान्यता धितो राखेर वाम नेतृत्वको सरकारमा नजाने बताए । संविधान मधेसमैत्री बनाउनेसँगमात्र तालमेल हुने सुमनले जिकिर गरे ।