एमालेसँग पार्टी एकता गरेमा माओवादी तीन टुक्रा हुन्छ : गजुरेल

सिरहा : देशभक्त जनगणतान्त्रिक मोर्चा नेपालका अध्यक्ष सीपी गजुरेलले नेकपा एमालेसँग प्रचण्डले पार्टी एकता गरेमा माओवादी तीन टुक्रामा विभाजन हुने खुलासा गरेका छन् । सिरहाको लहानमा मंगलबार आयोजित पत्रकार सम्मेलनमा उनले एमालेसँग एकता गरेमा प्रचण्डसँग केही नेता मात्र जाने बताए । उनले बाँकी दुई टुक्रा अलग हुने दावी गरे । उनले प्रचण्डसँग एकतामा सहभागी नहुने नेताहरुलाई आफूले फकाउने प्रयास गरिरहेको बताए ।

नेता गजुरेलले जनयुद्धको सबै एजेण्डालाई लत्याएर एमालेसँग पार्टी एकता गर्न लागेकोमा प्रचण्डसँग आक्रोश पोखे । '१० बर्षे जनयुद्धको मुख्य एजेण्डा लोकतान्त्रिक गणतन्त्र होइन्, जनगणतन्त्र थियो’, उनले भने, ‘तर लोकतान्त्रिक गणतन्त्रलाई नै जनगणतन्त्र भनिदैछ । यो गलत हो । हामीले जनगणतन्त्र चाहेका छौं । माओवादी भनेकै प्रचण्ड हो भन्ने भ्रम फैलिएछ' उनले थपे ।

उनले संविधानकै आडमा सरकार संस्थागत भ्रष्टाचारमा लागेको आरोप लगाएका छन् । सरकारले आफै पेट्रोलियम पदार्थको मूल्य बृद्धि गर्नुका साथै गैरकानुनी ढंगबाट करोडौं रुपैया बाँडेर संस्थागत भ्रष्टाचार गरिरहेको उनकाे आरोप छ । उनले सरकारद्वारा विकासको नाममा विघटित सांसदलाई पैसा बाँड्ने कार्य गतल भएको बताए । उनले भने, 'यो संविधान देशलाई पश्चगमनतिर लगिरहेको छ । देशमा राजनीतिक विकृति चरम अवस्थामा पुगेको छ । नेताहरुकै गलत हर्कतले राजनीति बेश्यावृति बनेको छ ।'