काठमाडौँ: नेपाली कांग्रेसका नेता बालकृष्ण खाँडले मंसिरको निर्वाचनबाट सबैभन्दा ठुलो दल बनेको नेकपा एमाले संविधान पालनामा चुकिरहेको आरोप लगाएका छन् ।
नेकपा एमालेले निर्वाचनमा ठुलो दल भएको घमण्डमा संवैधानिक निकायहरुमाथि अनुचित दबाव दिइरहेको बताउँदै खाँडले यस्ता गतिविधि तत्काल रोकिनुपर्ने जिकिर गरे ।
‘निर्वाचनपछिका कानुनी प्रत्रिया पुरा गर्ने काममा सरकार र निर्वाचन आयोग सक्रिय छन् । मतपरिणाम सार्वजनिक गर्ने काममा पनि आयोग लागि रहेको छ । तर संवैधानिक निकायलाई अनुचित दबाव दिने काम अहिले भइरहेको छ ।’
राष्ट्रपति र निर्वाचन आयोगमाथि पछिल्लो समय एमालेले दिएको दबावलाई स्वीकार्नै नसकिने बताउँदै उनले संविधान र कानुन अनुसार निर्णय हुने कुरामा कसैले बलमिच्याइँ गर्न नहुने उल्लेख गरे ।
‘संविधानको पालना गर्नु सबै दलको दायित्व हो । एमालेका नेताले निर्वाचन आयोगलाई दिएको दबाव बेठीक छ’, उनले भने, ‘यसअघि एमालेले राष्ट्रिय सभा गठनसम्बन्धी विधेयक पारित नगराउन राष्ट्रपतिलाई पनि उक्साएको हो । यी घटनाले एमाले गैह्रजिम्मेवार बन्दै गएको देखाउँथ्यो ।’
‘बढी सिट जितेपछि एमाले र उसका नेताहरु संविधानप्रति उत्तरदायी हुनुपर्ने हो’, अध्यादेश प्रमाणिकरण गर्नु राष्ट्रपतिको दायित्व भएको बताउँदै खाँडले भने, ‘यदि हारेको भए एमालेका नेताहरु संविधान च्यात्दै सडकमा निस्कन्थे ।
नेता खाँडले यो पटकको निर्वाचनमा हारेका स्थानमा एमालेले मतपरिणम बहिष्कार गर्दै हिँडेको बताउँदै यस्ता गतिविधिले उसको राजनीतिक इमानमा प्रश्न उठाएको उल्लेख गरे ।
प्रदेश प्रमुख पहिले
नेता खाँडले फरक प्रसङ्गमा राष्ट्रिय सभा गठनका लागि तत्काल प्रदेश प्रमुखको नियुक्ति हुनुपर्ने बताएका छन् । त्यसभन्दा अगाडि प्रधानमन्त्रीले पाँचवटै राष्ट्रिय दलसँग परामर्श गरेर निकास निकाल्न आवश्यक रहेको उनले बताए ।
‘मंगलबार बसेको कांग्रेसका शीर्ष नेताको बैठकमा हामीले प्रधानमन्त्रीलाई पाँचवटै राष्ट्रिय दलका नेतासँग बस्न भनेका छौँ’, उनले भने, ‘राष्ट्रिय सभाको तिथि घोषणासँगै प्रदेश प्रमुखहरुको नियुक्ति पनि तत्काल टुंग्याउनु जरुरी छ। ’
राष्ट्रिय सभाको निर्वाचन नभइ प्रतिनिधिसभाले पूर्णता नपाउने बताउँदै उनले प्रतिनिधि सभामा निर्वाचितको सूची प्रदेश प्रमुखलाई पठाउनुपर्ने तर्फ दलहरुले ध्यान दिनुपर्ने उल्लेख गरे ।
‘सबै प्रक्रिया पुरा गर्दा राष्ट्रिय सभाको निर्वाचन माघको तेस्रो साता मात्रै सम्भव देखिन्छ’, उनले भने, ‘प्रदेश प्रमुखको नियुक्ति आवश्यक भएकाले यसतर्फ अघि बढ्न हामीले प्रधानमन्त्रीलाई भनिसकेका छौँ । हामी सत्ता हस्तान्तरण गर्न आतुर छौँ ।’
प्रतिक्रिया दिनुहोस !
