काठमाडौं : वाइसिएलले एमालेसँग एकता जनयुद्ध, जनभावना र क्रान्तिकारी स्प्रिडका आधारमा गर्नु पर्ने निर्णय गरेको छ । पुष १६ र १७ गते भएको केन्द्रीय पदाधिकारीको विस्तारित बैठकले सो निर्णय गरेको हो।पार्टीले सबै नेता कार्यकर्तालाई समान अवसर प्रदान गर्नु पर्ने निर्णय वाइसिएलको गरेको छ । वाइसिएलले समान अवसर प्रदानका लागि पार्टीलाई खाका सहितको सुझाव दिएको छ।
बैठकमा समानुपातिक प्रणालीबाट संसदमा प्रतिनिधित्व जम्मा १ पटक, मन्त्रिमण्डलमा प्रतिनिधित्व जम्मा २ पटक, प्रत्यक्ष संसदमा चुनाव लड्ने जम्मा २ पटक र तेस्रोपटक लड्न इच्छुक रहे १ पटक होल्डमा बस्ने गरी वा यस्तै कुनै बैज्ञानिक नीति र विधिको विकास गर्न पार्टी नेतृत्व समक्ष आग्रह गर्ने निर्णय भएको छ । पार्टीको प्रमुख नेताको हकमा भने यस्तो व्यवस्थामाथि विचार गर्न सकिने सुझाव वाइसिएलले दिएको छ ।
सम्पूर्ण संगठनको ध्यान मुलुकको सम्बृद्धि तथा स्वरोजगारमा केन्द्रीत गर्ने निर्णय गर्दै ६ महिनामा १ हजार युवालाई रोजगारी प्रदान गर्न विशेष पहल गर्ने निर्णय गरिएको वाइसिएल महासचिव सुवोधराज शेर्पालीले जानकारी दिए । समानान्तर संगठन निर्माणमा सहभागी भएका केन्द्रीय सदस्यहरु दीपक पट्टेल, कमल न्यौपाने, रबि राम र अरुणकुमार यादवलाई ७ दिनभित्र आत्मआलोचना पत्र केन्द्रीय समितिमा बुझाउन र सुध्रिन चेतावनी दिने निर्णय भएको शेर्पालीले जानकारी दिए। । ७ दिनभित्र आत्मआलोचना पत्र नबुझाए स्वत निलम्बन भएको ठहरिने निर्णय भएको उनले बताए । संगठनका केन्द्रीय सदस्य इन्द्र कठायतलाई नेपाली कांग्रेससँग साँठगाँठ गरेका कारण साधारण सदस्यसमेत नरहने गरी निस्कासन गरिएको छ ।
वाइसिएल अध्यक्ष राम प्रसाद सापकोटा 'दीपशिखा'को अध्यक्षमा बसेको बैठकमा प्रतिनिधि सभा र प्रदेश सभा निर्वाचनको समिक्षा समेत भएको छ । बैठकले स्थानिय तहमाबाट १/१ जनालाई संगठनको केन्द्रीय योजनामा क्षमता अभिबृद्धि तथा सिपमुलक तालिम दिने निर्णय गरेको छ । वाइसिएलले फागुन महिनाभित्र वडादेखि प्रदेशसम्मका सम्मेलन सम्पन्न गर्ने निर्णय गरेको छ ।
संगठनका केन्द्रीय सचिव रंजित यादव, केन्द्रीय सदस्य अनिल पासवान, गणेश राउतलाई २ नं प्रदेशको क्रमश: इन्चार्ज, सहइन्चार्ज र संयोजक तोकेको छ ।
बैठकमा रोल्पाका शहिद परिवार मंगले दम्पत्तिको परिवारलाई पार्टी नेता वर्षमान पुनले आवासको व्यवस्था गरेकोमा संगठनले लत्ता कपडा र घरमा आवश्यक पर्ने सम्पूर्ण कपडा र भरणपोषणमा सहयोग गर्ने निर्णय समेत भएको छ ।
प्रतिक्रिया दिनुहोस !
