तोकिएन प्रदेश मुकाम र प्रमुख

काठमाडौं : प्रदेश प्रमुख तथा अस्थायी मुकाम तोक्ने अपेक्षा गरिएको शुक्रबारको मन्त्रिपरिषद् बैठकले यी दुवै विषयमा निर्णय लिन सकेन ।प्रदेश प्रमुख, मुकाम तोक्ने काम सरकारको भएको भन्दै बिहीबार सर्वदलीय बैठकले सरकारलाई निर्णय लिन सहमति दिएको थियो । सर्वदलीय बैठकको भोलिपल्ट शुक्रबार बसेको मन्त्रिपरिषद् बैठकले यी दुई विषय टुंग्याउने अपेक्षा गरिए पनि सरकारले राष्ट्रियसभा निर्वाचन माघ २४ मा गराउने मात्रै निर्णय लिएको छ ।

प्रदेश प्रमुखका लागि चर्चा गरिएका नामावली तथा अस्थायी मुकाम तोक्ने विषयमा सत्तारुढ दलभित्रै व्यापक छलफल हुन नसक्दा शुक्रबार सरकारले यो विषयमा निर्णय लिन नसकेको सरकारी अधिकारीले बताएका छन् । तर, सरकारी अधिकारीले प्रदेश प्रमुख र अस्थायी मुकाम मन्त्रिपरिषद्को आगामी बैठकबाट तोक्ने गरी गृहकार्य भइरहेको जनाएका छन् ।

अपजस आउने काम भएकाले पाँच दलको सहमतिमै गर्ने तर ठोस सहमति नभए पनि आगामी मन्त्रिपरिषद् बैठकबाट निर्णय लिने सरकारको योजना छ । सर्वदलीय बैठकमा वाम गठबन्धनका नेता एवं माओवादी केन्द्रका अध्यक्ष पुष्पकमल दाहालले प्रदेश प्रमुख, प्रदेशहरूको सदरमुकाम र राष्ट्रियसभा निर्वाचन मिति तोक्न सरकार एक्लैले सक्ने भन्दै त्यसका सहमति जुटाइरहनु नपर्ने धारणा व्यक्त गरेका थिए ।

सरकारका प्रवक्ता एवं सञ्चारमन्त्री मोहनबहादुर बस्नेतले सरकारले प्रदेश प्रमुख र मुकाम तोक्न सहमतिको प्रयास भइरहेको जनाउँदै सहमति नभए पनि आगामी मन्त्रिपरिषद् बैठकबाट निर्णय लिइने बताए । उनले अन्नपूर्णसँग भने, ‘सरकारले सहमतिकै लागि प्रयास गरिरहेको छ । सहमति नभए पनि आगामी बैठकले यसमा निर्णय लिन्छ ।’

‘सरकारले सहमतिकै लागि प्रयास गरिरहेको छ । सहमति नभए पनि आगामी बैठकले यसमा निर्णय लिन्छ ।’ -मोहनबहादुर बस्नेत, सञ्चारमन्त्री

सात वटा प्रदेश प्रमुखको नियुक्तिमा वाम गठबन्धनबाट प्रतिनिधित्व गराउने प्रयासमा कांग्रेस रहेको स्रोतले बताएको छ । ‘कांग्रेसले आफ्नो भागमा तीन, वाम गठबन्धनलाई दुई र मधेसवादीलाई दुई गरी सात प्रमुख नियुक्त गर्ने रणनीतिमा गृहकार्य गरिरहेको छ । यो रणनीति असफल भए कांग्रेसले आफ्ना तर्फबाट चार र अन्यलाई तीन प्रदेश प्रमुख दिने गरी निर्णय गर्छ’, स्रोतले भन्यो ।

एमाले उपाध्यक्ष भीमबहादुर रावलले आफूहरूले राष्ट्रियसभा निर्वाचन मिति, प्रदेश प्रमुख र प्रदशेहरूको मुकाम तोक्न सरकारलाई सर्वाधिकार दिएको बिहीबारको सर्वदलीय बैठकपछि बताएका थिए । उनले भने, ‘मन्त्रिपरिषद् वा प्रधानमन्त्रीले पाएको जिम्मेवारी वहन गर्न सक्दैनन् । आफ्नो जिम्मेवारी र दायित्वबाट पन्छिनु राम्रो हुँदैन ।’

एमाले प्रदेश प्रमुख र प्रदेशहरूको मुकाम तोक्ने कार्य पहिल्यै हुनुपर्ने मान्यतामा रहेको उनले बताए । रावलले भने, ‘अहिले आएर पनि सरकारले आफ्नो कर्तव्य पूरा गर्न नसक्नु गैरजिम्मेवारीको पराकाष्ठा हो ।’

कांग्रेस नेता बालकृष्ण खाँणले प्रदेश प्रमुख र मुकाम यसै साता तोकिने जानकारी दिए । ताजा जनादेशअनुसार सरकार गठनका लागि मार्गप्रशस्त गर्न सरकारले राष्ट्रियसभा निर्वाचन मिति तय गरेको दाबी खाँणले गरे ।