सुदूरपश्चिम सेमिफाइनलमा
धनगढी : सर्वाधिक राशिको सुदूरपश्चिम खप्तड गोल्डकपमा आयोजक सुदूरपश्चिम- ११ ले विजयी सुरुवात गरेको छ । प्रतियोगिताको उद्घाटन खेलमा काठमाडौंको ए डिभिजन क्लब च्यासललाई पेनाल्टी सुटआउटमा पराजित गर्दै आयोजकले विजयी सुरुआत गरेको हो । निकै प्रतिस्पर्धात्मक खेलमा च्यासल ५-४ गोलले पराजित भयो ।
बाई पाएर क्वार्टरफाइनलमा पुगेको आयोजक टोलीले जितसँगै सेमिफाइनलमा स्थान बनाएको छ । पहिलो हाफ गोलरहित बराबरीमा सकिएको खेलको दोस्रो हाफको ७१औं मिनेटमा च्यासलका विदेशी खेलाडी सेगुनले गोल गर्दै सुरुआती अग्रता दिलाएका थिए । च्यासलको त्यो अग्रता १५ मिनेट मात्रै टिक्यो । खेलको हाफको ८५औं मिनेटमा सुदूरपश्चिम-११ का विनोद केसीले गोल गर्दै खेललाई बराबरीमा ल्याएका थिए । निर्धारित समयमा १-१ गोलको बराबरी भएपछि खेलको नतिजा पेनाल्टी सुटआउटबाट लिइएको थियो ।
पेनाल्टी सुटआउटमा च्यासलका सुमन लामाको प्रहारलाई सुदूरपश्चिमका गोलकिपर जीवन भट्टराईले बचाएपछि आयोजक सेमिफाइनलमा पुगेको हो । सुदूरपश्चिमका नियमित गोलकिपर अमानत शेख घाइते भएपछि पहिलो हाफमा मैदानमा प्रवेश गरेका भट्टराईले च्यासलका खेलाडीका धेरै प्रहार बचाएका थिए । भट्टराई खेलको म्यान अफ दी म्याच बने । उनले नगद १० हजार रुपैयाँ प्राप्त गरे ।
प्रतियोगितामा भुटानको एकसहित १२ टोलीको सहभागिता रहेको छ । प्रतियोगिताको विजेताले ११ लाख ११ हजार एक सय ११, उपविजेताले पाँच लाख ५५ हजार पाँच सय ५५ प्राप्त गर्नेछन् । यस्तै विभिन्न विधाका उत्कृष्ट खेलाडीले जनही १५ हजार रुपैयाँ प्राप्त गर्नेछन् । प्रतियोगिताको उत्कृष्ट खेलाडीले मोटरसाइकल प्राप्त गर्नेछन् । प्रतियोगिताको पूर्वसांसद आरजु देउवाले उद्घाटन गरिन् ।
प्रतिक्रिया दिनुहोस !
