छिटै प्रदेश प्रमुख र प्रादेशिक राजधानी तोकिने छ : अर्थमन्त्री कार्की

काठमाडौं : अर्थमन्त्री एवम् नेपाली कांग्रेसका नेता ज्ञानेन्द्रबहादुर कार्कीले छिटै प्रदेश प्रमुख र प्रादेशिक राजधानी तोकिने बताए। रिपोर्टर्स क्लब नेपालमा नेपाली कांग्रेस काठमाडौं–धनकुटा सम्पर्क समितिले आयोजना गरेको बधाई तथा शुभकामना कार्यक्रममा बोल्दै मन्त्री कार्कीले संविधानको व्यवस्था अनुसार प्रदेशको राजधानी तोकिने भएकाले आधारभूत कुरा र सम्भावना भएको स्थानलाई प्रदेशको राजधानी तोक्ने गृहकार्यमा सरकारले गरिरहेको बताए। उनले भने , 'छिट्टै प्रदेश प्रमुख र प्रदेश अस्थायी राजधानी प्रक्रिया अनुसार तोकिने छ।'

उनले संक्रमणकालको अन्त्य भएको र मुलुक समृद्धिको बाटोतर्फ उन्मुख भएको बताए। कार्कीले भने,'लामो समय देखिको संक्रमणकालको अन्त्य भएको छ, कांग्रेसले त्यसको नेतृत्व लियो, कांग्रेस चुनाव हारेर पनि मुलुकले जितेको छ, यसले पनि कांग्रेस र लोकतन्त्रको भविष्य उज्जवल छ भन्ने संकेत गर्दछ, त्यसैले कांग्रेसलाई नयाँ तरिकाले जनताको बीचमा जानुको विकल्प छैन।'

पूर्व सांसद मोनहरनारायण श्रेष्ठले प्रदेश नम्बर १ को राजधानी धनकुटालाई तोक्न सरकारसँग माग गरेका छन्। उनले भने,'प्रदेश नम्बर १ को उपयूक्त राजधानी धनकुटा हुन्छ, भौगोलिक हिसावमा सेन्टरमा पर्छ, पूर्वाभार, सामथ्र्य, हावापानी, सुन्दरता र अन्तराष्ट्रिय सिमानाको देष्टिकोणले पनि त्यत्तिकै उचित छ।'

कार्यक्रममा विजयीसन्तोषी राईले आधारपत्र प्रस्तुत गरेका थिए। धनकुटा जिल्ला कार्य समितिका पूर्व सभापति हरि अधिकारी, समानुपातिक प्रदेश सभा सदस्य लिला शुब्बाले प्रदेश नम्बर १ को प्रादेशिक राजधानी धनकुटालाई तोक्न सरकारसँग माग गरेका छन्। कार्यक्रममा सुनसरीबाट प्रतिनिधि सभा सदस्यमा निर्वाचित सांसद एवम् अर्थमन्त्री ज्ञानेन्द्र बहादुर कार्की र प्रदेश सांसद लिला शुब्बालाई अभिनन्दन गरिएको छ।