काठमाडौँ । इङ्लिस प्रिमियर लिगमा निरन्तर १९ खेलमा अपराजित रहेको म्यानचेस्टर सिटीले एफए कपमा पनि रवाफिलो प्रदर्शन गरेको छ ।
शनिबार राति सम्पन्न बेलायतको प्रतिष्ठित एफए कपको तेस्रो राउन्डको खेलमा एक गोलले पछि परेको अवस्थालाई उल्ट्याउँदै सिटीले बर्न्लेमाथि ४–१ को सहज जित निकालेको हो ।
खेलको २५ औँ मिनेटमा डिफेन्डरको गल्तीको फाइदा उठाउँदै बर्न्लेका एस्ले बार्नेसले गोल गरेपछि पछि परेको सिटीले चारवटै गोल दोस्रो हाफमा गरेको हो ।
घरेलु मैदानमा पहिलो हाफमा एक गोलले पछि परेको सिटीका लागि दोस्रो हाफको ५६ औँ र ५८ औँ मिनेटमा गोल गर्दै सर्जियो अग्वेरोले २–१ को अग्रता दिलाउन सफल भए ।
त्यसपछि झनै आक्रमक भएको सिटीका लागि ल्योरे सानेले ७१ औँ मिनेटमा र ८२ औँ मिनेटमा ब्रेर्नार्डो सिल्भाले गोल गरेपछि सिटीले ४–१ को अग्रता बनायो ।
यो जितपछि सिटी एफए कपको चौथो चरणमा पुग्न सफल भएको छ । पेप ग्वार्डिओलाको कमानमा रहेको सिटीले यो सिजन प्रिमियर लिगमा पनि अन्य क्लब भन्दा १५ अंकको अग्रता बनाइरहेको छ ।
प्रतिक्रिया दिनुहोस !
