कान्जिरोवा, राई, नमुना र काभ्रे बोर्डर अन्तिम आठमा

भक्तपुर : कान्जिरोवा, राई, नमुना र काभ्रे बोर्डर फुटबल क्लव भक्तपुरमा जारी सुटर्स कप प्रतियोगिताको अन्तिम आठमा पुग्न सफल भएका छन् । सुटर फुटबल क्लबद्वारा आयोजित प्रतियोगितामा सोमबार कान्जिरोवा, राई, नमुना र काभ्रे बोर्डरले जित निकाल्दै क्वार्टरफाइनलमा पुग्न सफल भएका हुन् ।

भक्तपुर नपा ७ स्थित माहेश्वरी खेलमैदानमा जारी प्रतियोगिताको सोमबार भएको पहिलो खेलमा कान्जिरोवाले भक्तपुर नगरपालिका टीमलाई ३–१ गोलले पन्छाएको हो । भक्तपुर नपाले खेलमा पहिलो अग्रता लिएको थियो । बिजिल प्रजापतिले खेलको नवौं मिनेटमै गोल गरेर भक्तपुर नपालाई अग्रता दिलाएका थिए ।

खेलको २७ औं मिनेटमा हेमन्त शाहीले गोल गर्दै कान्जिरोवालाई बराबरीमा ल्याए । पहिलो हाफसम्म बराबरीमा सकिएको खेल दोस्रो हाफमा कान्जिरोवा हावी भएको थियो । दोस्रो हाफ सुरु भएको चौथो मिनेटमै उदय शाहीले गोल गर्दै कान्जिरोवाको अग्रता दोब्बर पारे । हेमन्तले खेलको ६२ औं मिनेटमा दोस्रो गोल गर्दै कान्जिरोवाको जीत सुनिश्चित पारे ।

त्यस्तै राई फुटबल क्लबले भक्तपुर खेलकुद विकास संस्थालाई २–० गोलले हराउँदै क्वार्टरफाइनलको यात्रा तय ग¥यो । पहिलो हाफ गोलरहित बराबरीमा सकिएको खेलको दोस्रो हाफको आठौं र चौधौं मिनेटमा दुई गोल गर्दै राईको जीत पक्का गरे ।
नक आउटको आधारमा भइरहेको अर्को खेलमा नमुना स्पोर्टस् क्लबले आयोजक टीम सुटरलाई ३–१ गोलले पाखा लगायो । खेलमा नमुनाले पहिलो अग्रता लिएको थियो । उसको लागि खेलको ११ औं मिनेटमा धिरज श्रेष्ठले पहिलो गोल गरेका थिए । उनैले २६ औं मिनेटमा अर्को गोल थप्दै नमुनाको अग्रता दोब्बर पारे ।

दोस्रो हाफ सकिन ६ मिनेट बाँकी हुँदा टीम सुटरका असिम थापाले एक गोल फर्काउँदै नमुनाको अग्रता घटाए । तर दोस्रो हाफमा नमुनाको अघि टीम सुटरको जोर नचल्दा खेलको ५७ औं मिनेटमा पबिल मगरले नमुनाको लागि र्को गोल थपे ।

सोमबार भएको अन्तिम खेलमा काभ्रे बोर्डर आत्मघाती गोलमार्फत क्वार्टरफाइनलमा पुग्न सफल भयो । काभ्रे बोर्डरका खेलाडीले गोलपोस्टमा प्रहार गरेको बल मध्यपुर युथ एसोसियसनका निश्चल धमलाले क्लियर गर्न नसक्दा आफ्नै पोस्टभित्र बल छिराउन पुगेका हुन् । कडा प्रतिस्पर्धा भएको उक्त खेलमा दुवै टीमले राम्रा अवसरहरु गुमाएका थिए ।

२४ वटा फुटबल क्लबको सहभागिता रहेको प्रतियोगिताका विजेताले ५५ हजार रुपैयाँ नगद पुरस्कार हात पार्नेछ । पुस २९ गतेसम्म हुने स्पर्धाका उपविजेताले भने २५ हजार रुपैयाँ नगद पुरस्कार पाउने सुटर फुटसल क्लबका अध्यक्ष रमेश सुवालले जानकारी दिए ।