रुपन्देही सुदुरपश्चिम खप्तड गोल्डकपको क्वार्टरफाइनलमा
धनगढी : अग्नि रुपन्देही ११ धनगढीमा जारी दोस्रो आमन्त्रित अन्तराष्ट्रिय नेपाल आइस सुदुरपश्चिम खप्तड गोल्डकपमा क्वार्टरफाइनलमा प्रवेश गरेको छ । भुटानको ड्रुकस्टार क्लवलाई ३–२ ले पराजित गर्दै रुपन्देही ११ क्वाटरफाइनलमा प्रवेश गरेको हो ।
क्वार्टरफाइनलमा पुग्ने क्रममा रुपन्देहीले पहिलो हाफमा २–० ले अग्रता लियो भने दोश्रो हाफमा थप १ गोल गर्यो । उता भुटानले दोस्रो हाफमा २ गोल गर्यो ।
रुपन्देही ११ का लागि अमर डङगोलले पहिलो हाफको २२ औँ र ३८ औ मिनेटमा गोल गरे भने मनिष थापाले दोस्रो हाफको ६९ औ मिनेटमा तेश्रो गोल गरे ।
भुटानको डुकस्टार क्लवको तर्फबाट ५८ औँ मिनेटमा क्वीन्गा चब्गे र अतिरिक्त समयको दोश्रो मिनेटमा एसी दोर्जीले गोल गरे । भुटानले अन्तिम समयमा पाएको पेनाल्टीको सदुपयोग गर्न नसक्दा हार व्यहोर्न परेको हो ।
गौतम श्रेष्ठले डि बक्स भित्र फल गरेपछि डुकस्टारले पेनाल्टी पाएको थियो । तर पेनाल्टीमा केजङ वाङजीको प्रहारलाई रुपन्देहीका गोल किपर सुजित गुरुङले बचाए । खेलका म्यान अफ द म्याच रुपन्देहीका अमर डङगोल भए ।
पहिलो संस्करणमा पनि सहभागी भएको डुकस्टारले त्यस बेला वेष्ट काठामाडौँलाई पहिलो खेलमा ४–१ ले हराएको थियो भने दोस्रो खेलमा डिफेन्डिङ च्याम्पियन मनाङ मर्स्याङ्दीसँग २–० ले पराजित भएको थियो । अघिल्लो संस्करणको भन्दा राम्रो टीम ल्याउँदा पनि खेलाडीहरुले यसपाली सोचे अनुसार खेल्न नसकेको ड्रुकस्टारका प्रशिक्षक कोता नाम्भेले वताए ।
‘टीम अझ राम्रो बनाएर आएका थियौं, भुटानका राष्ट्रिय खेलाडीहरु पनि क्लवमा थिए तर राम्रो खेल्न सकेनने’, उनले भने, ‘दोस्रो हाफमा निकै दवावमा राखेर खेल्दा पनि गोल गर्न सकेनौं । पेनाल्टी पनि चुकाउँदा थप समस्या आयो ।’
अग्नि रुपन्देही ११ का प्रशिक्षक दयाराम सापकोटाले टीमले सोचे अनुसारको खेल्न नसकेको बताउँदै अर्को खेलमा अझ सुधार गर्ने बताए ।
क्वाटरफाईनलमा अव रुपन्देही ११ बाई पाएर क्वाटरफाईनलमा पुगेको मनाङ मस्र्याङग्दीसँग पुस २८ गते भिड्ने छ । बुधबार सेमीफाइनल प्रवेशका लागि सिएमजी संकटा र एपीएफबीच प्रतिस्पर्धा हुने प्रतियोगिताका संयोजक ओम विक्रम चन्दले जानकारी दिए ।
प्रतिक्रिया दिनुहोस !
