नाचघरमा गुञ्जियो नेपाली लोकधुन
काठमाडौं : जापानमा बसेर बाँसुरी र तबलाको माध्यमबाट नेपाली गीतसंगीत प्रवद्र्धन गर्दै आएको चौतारी ब्यान्डका बाँसुरीवादक पञ्च लामा, तबलावादक श्रवण लामा र जापानी कलाकार तेराकादो मित्सिगुले शुक्रबार साँझ नाचघरमा लोक सांगीतिक धुनबाट दर्शकलाई मनोरञ्जन दिए । सांस्कृतिक संस्थानको आयोजनामा भएको सांगीतिक साँझमा यी कलाकारले विभिन्न नेपाली र जापानी धुनबाट दर्शकको मन जितेका हुन् । कलाकार आफंैले निर्माण गरेको वृत्तचित्र ‘सुन्दर नेपाल’ को प्रदर्शनसँगै ‘चौतारी साँझ- २०७४’ सुरु भएको थियो ।
पञ्च लामाले बाँसुरीमार्फत मनकामना धुन सुनाए । यसपछि पञ्च र श्रवणले बाँसुरी र तबलाको फ्युजन प्रस्तुत गरे । अघिल्लो प्रस्तुतिमा प्रकाशको किरणलाई पछ्याउँदै पञ्च र श्रवणले बाँसुरी र तबलाको धुन ‘जर्नी थ्रु दी लाइट’ शीर्षकमा प्रस्तुत गर्दा जापानी कलाकार तेराकादो मित्सिगुले गितारमा साथ दिए । सोही क्रममा यी तीनले जापानी धुन ‘टोकियो नाइट धुन’ पनि प्रस्तुत गरे ।
फ्युजन गरेर ‘दी मेलानकोली नोट इन काठमाडौं’ शीर्षकमा प्रस्तुत गरिएको काठमाडौंका केही स्थानीय धुनहरूले कार्यक्रमको रौनक बढाएको थियो । यही क्रममा उनीहरूले ए कान्छा शीर्षकमा नेपाली लोकधुन पनि प्रस्तुत गरे ।
अघिल्लो चरणमा ‘सी वेभ’ शीर्षकमा वाद्यवादनबाट यी कलाकारले प्रस्तुत गरेको समुद्रको छाल धुन र ‘दी हिमालयन’ शीर्षकका हिमाली क्षेत्रका लोकधुनलाई दर्शकले निकै रुचाए । धुनसँगै कलाकारलाई दर्शकले तालीले निरन्तर साथ दिइरहे । उनीहरूको ड्रम सेसनको प्रस्तुति निकै तताउने खालको थियो । ड्रम सेसनअन्तर्गत ड्रमबाट श्रवण र बाँसुरीबाट पञ्चबीच युगलवादन प्रस्तुत भएको थियो।
कार्यक्रमको अन्तिम चरणमा पञ्चले एकल बाँसुरीको धुन सुनाए । ‘क्याराभान’ र ‘वनचरी’ शीर्षकका लोकधुनमा यी तीन कलाकारको प्रस्तुति बेजोड थियो । उनीहरूले मौलिक धुनअन्तर्गत मुरलीको माध्यमले विभिन्न चराको आवाज र गीत सुनाएर वनचरी भाका प्रस्तुत गरे । ‘डान्सिङ बर्ड’ शीर्षकको धुन पनि त्यत्तिकै मीठो थियो । ‘लाम्बादा’ शीर्षकमा सांगीतिक धुनसँगै यी तीनले चौतारी साँझ- २०७४ टुंग्याए ।
सर्लाहीको हरिवन नगरपालिका— ५ स्थित चेतना सन्देश नेपालद्वारा सञ्चालित द्वन्द्वपीडित बालगृहका लागि यो चौतारी साँझमा पञ्च र श्रवण लामाले १२ लाख रुपैयाँ सहयोग प्रदान गरे ।
विगतका वर्षमा जस्तै यस पटक पनि नेपाली र जापानी संगीतलाई एकै थलोमा प्रस्तुत गर्न ‘चौतारी साँझ- २०७४’ आयोजना गरिएको सांस्कृतिक संस्थानका महाप्रबन्धक राजेश थापाले बताए ।
प्रतिक्रिया दिनुहोस !
