काठमाडौँः स्टार स्ट्राइकर एलेक्सिस सान्चेज अर्को क्लबमा सर्ने तयारीमा जुटेका बेला आर्सनललाई बोर्नमाउथले झट्का दिएको छ । इङ्लिस प्रिमियर लिग अन्तरगत आइतवार राति भएको खेलमा बोर्नमाउथले २–१ को जित निकालेको हो ।
बोर्नमाउथलाई जिताउने क्रममा खेलको ७० औँ मिनेटमा विल्सन र ७४ औँ मिनेटमा इबेले निर्णायक गोल गरे । पराजित आर्सनलका लागि खेलको ५२ औँ मिनेटमा बेलेरिनले गोल गर्दै अग्रता दिलाउन सफल भएका थिए । यो हारसँगै आर्सनल लगातार पाँच खेलमा जितविहीन बनेको छ ।
जसका कारण म्यानेजर आर्सेन वेङ्गरमाथि निरन्तर दबाब बढ्दै गएको छ । आर्सनलले पछिल्लो पटक डिसेम्बर २९ मा प्रिमियर लिगको खेलमा क्रिस्टल प्यालेसमाथि ३–२ को जित निकाले यता अर्को जित आत्मसाथ गर्न पाएको छैन ।
आर्सनलले त्यसअघि डिसेम्बर २३ मा लिभरपुलसँग ३–३ को बराबरी खेलेको थियो । क्रिस्टल प्यालेसलाई हराएपछि आर्सनलले प्रिमियर लिगमा वेस्ट ब्रोम र चेल्सीसँग बराबरी खेल्यो । उसले जनवरी ११ मा भएको काराबाओ कपमा चेल्सीसँगै गोलरहित बराबरी खेलेको थियो ।
बोर्नमाउथसँगको हारपछि आर्सनलले प्रिमियर लिगमा २३ खेलबाट केबल ३९ अंकमात्रै जोड्दै लिगको छैटौँ स्थानमा छ । विजयी बोर्नमाउथ २३ खेलबाट २४ अंक जोड्दै लिगको १३ औँ स्थानमा छ ।
प्रतिक्रिया दिनुहोस !
