यस्तो छ साना दलको चुनावी समीक्षा
काठमाडौं : प्रदेश र प्रतिनिधिसभा निर्वाचनमा पराजित भएपछि साना दलहरू यतिबेला चुनावी समीक्षामा व्यस्त छन् । आफ्नो पराजयलाई सबैजसो साना दलले ‘अनपेक्षित’ भनेका छन् ।प्रतिनिधिसभातर्फ तीन र प्रदेशसभामा १.५ प्रतिशत थ्रेस होल्ड कटाउन नसकेर राष्ट्रिय मान्यताबाट समेत वञ्चित बनेका दलहरूले पराजयको प्रमुख कारण भने कमजोर संगठनलाई नै मानेका छन् । चुनावको मुखमा ठूला दल गठबन्धन बनाएर निर्वाचनमा गएका कारण सोचेजस्तो परिणाम ल्याउन नसकेको उनीहरूको निचोड छ ।
‘यो पटक राष्ट्रिय पार्टी, अर्काे पटक देशको नेतृत्व’ भन्ने नाराका साथ चुनावमा होमिएको विवेकशील साझा पार्टीले प्रतिनिधिसभामा एक सिट पनि जित्न सकेन । समानुपातिकतर्फ तीन प्रतिशत मत ल्याउन नसक्दा ‘राष्ट्रिय पार्टी’ बन्ने उसको सपना पनि पूरा भएन । पार्टी निर्माणको चार महिनामै निर्वाचनमा होमिनुपरेको जनाउँदै विवेकशीलले संगठनबिनै उम्मेदवारी दिँदा पनि उत्साहजनक मत आएको प्रतिक्रिया दिएको छ । प्रतिनिधिसभामा काठमाडौं क्षेत्र १ का उम्मेदवार रविन्द्र मि श्र कांग्रेसका प्रकाशमान सिंहसँग झिनो मतले पराजित भए भने प्रदेश ३ मा साझाले तीनवटा सिट हात पारेको छ ।
दोस्रो संविधानसभा निर्वाचनमा समानुपातिकतर्फ पाँच सिट जितेको नेकपा मालेले यसपटक एक सिट पनि जित्न सकेन । माले महासचिव सीपी मैनालीले कमजोर संगठन र वामपन्थी लहरका कारण पराजित भएको दाबी गरे । उनले भने, ‘पहिलो कुरा त संगठन नै हो । त्यसमाथि दुई ठूला वाम दल मिलेपछि हाम्रो पार्टी चेपुवामा पर्यो ।’
विवेकशील साझा : संगठनबिनै उम्मेदवारी दिँदा पनि उत्साहजनक मत आयो ।
माले : कमजोर संगठन र वामपन्थी लहरका कारण हारियो ।
नयाँ शक्ति : पार्टीका नीति जनतासम्म लैजान नसक्दा अपेक्षाकृत परिणाम आएन ।
वैकल्पिक शक्तिका रूपमा प्रचार गरिएको बाबुराम भट्टराई नेतृत्वको नयाँ शक्ति पार्टीले महाधिवेशन आयोजक समितिको बैठक बोलाएर चुनावी समीक्षा गरेको छ । चुनावी समीक्षा र आगामी रणनीति तय गर्न बसेको बैठकले पार्टीका नीति जनतासम्म लैजान नसक्दा अपेक्षाकृत परिणाम नआएको निष्कर्ष निकालेको थियो । नयाँ शक्तिका नेता गंगा श्रेष्ठले भने, ‘हामी राष्ट्रिय दल हुन्छौं भन्नेमा विश्वस्त थियौं, तर परिणाम सोचेअनुसार आएन ।’
सरकारमा सहभागिताको विषयलाई लिएर निर्वाचनअघि विभाजित राप्रपा, राप्रपा प्रजातान्त्रिक र एकीकृत राष्ट्रवादीले पनि कमजोर संगठनका कारण पार्टीका एजेन्डा जनतामाझ लैजान नसकेको जनाएका छन् । पार्टी एकतापछि संसद्मा ३७ सिटसहित चौथो शक्तिका रूपमा रहेको राप्रपाले चुनावको मुखमा विभाजन हुँदा पराजित हुनुपरेको दाबी गरेको छ । राप्रपाले राष्ट्रिय तथा अन्तर्राष्ट्रिय शक्तिहरूले राप्रपालाई कमजोर बनाउन चुनावको मुखमा पार्टी विभाजन गरेको आरोप लगाएको छ भने पशुपतिशम्शेर राणा नेतृत्वको राप्रपा प्रजातान्त्रिकले देशभर पार्टीको संगठन निर्माण गर्न नसक्नुलाई हारको कारण मानेको छ ।
सरकारमा सहभागिताको विषयलाई लिएर निर्वाचनअघि विभाजित राप्रपा, राप्रपा प्रजातान्त्रिक र एकीकृत राष्ट्रवादीले पनि कमजोर संगठनका कारण पार्टीका एजेन्डा जनतामाझ लैजान नसकेको जनाएका छन् । पार्टी एकतापछि संसद्मा ३७ सिटसहित चौथो शक्तिका रूपमा रहेको राप्रपाले चुनावको मुखमा विभाजन हुँदा पराजित हुनुपरेको दाबी गरेको छ । राप्रपाले राष्ट्रिय तथा अन्तर्राष्ट्रिय शक्तिहरूले राप्रपालाई कमजोर बनाउन चुनावको मुखमा पार्टी विभाजन गरेको आरोप लगाएको छ भने पशुपतिशम्शेर राणा नेतृत्वको राप्रपा प्रजातान्त्रिकले देशभर पार्टीको संगठन निर्माण गर्न नसक्नुलाई हारको कारण मानेको छ ।