कांग्रेस केन्द्रीय कार्यसमिति बस्दै, निर्वाचनको समीक्षा मूख्य एजेन्डा
माघ २, २०७४ मंगलबार १४:३४:०
काठमाडौँ: लामो समयपछि नेपाली कांग्रेस केन्द्रीय कार्यसमितिको बैठक बस्ने भएको छ । पार्टीका प्रवक्ता विश्वप्रकाश शर्माका अनुसार बिहीबारका लागि केन्द्रीय कार्य समितिको बैठकको मिति तोकिएको हो ।
मंसिरमा भएको प्रदेश र प्रतिनिधि सभाको निर्वाचनमा नराम्ररी हार व्यहोरेपछि कांग्रेसको नीति र नेतृत्व नै फेरिनुपर्ने आवाज उठ्दै आएको छ।
नेताहरु नवीन्द्रराज जोशी र गगन थापासहितले चुनावको पराजयको प्रमुख दोषी सभापति शेरबहादुर देउवा भएकाले उनले राजीनामा दिएर नयाँलाई बाटो प्रशस्त गर्नुपर्ने अडान राख्दै आएका छन् ।
अर्कातिर नेताहरु विश्वप्रकाश शर्मासहितले निर्वाचनको पराजयको दोष पार्टी सभापतिको टाउकोमा मात्रै थोपरेर अरु नेता उम्किन नपाइने बताउँदै आएका छन् ।
केन्द्रीय समिति बैठक बस्न नसकेको अवस्थामा कांग्रेसमा गुटगत सक्रियता पनि बढेको छ । केही दिनदेखि वरिष्ठ नेता रामचन्द्र पौडेलसहितले गुटगत भेला गरिसकेका छन् ।
अर्कातिर कोइराला परिवारका शेखर, शशांक र सुजाता पनि कोइराला परिवार तथा कांग्रेसको विरासत थेग्न भन्दै छुट्टै गुट निर्माणमा सक्रिय भएका छन् ।
देउवा पक्षले भने चुनावमा पराजय वाम गठबन्धन पनि भएको बताउँदै आन्तरिक कारणबारे छलफल गर्न सकिने तर एउटा व्यक्तिलाई मात्रै दोषी बनाउन नहुने अडान राखिरहेको छ ।
विवादका बीच प्रवक्ता शर्माले माघ ४ गते बिहान ११ बजेलाई बैठक बोलाइएको जानकारी दिए । 'माघ ४ को केन्द्रीय समिति बैठकमा रास्ट्रिय सभा निर्वाचन तयारी तथा निर्वाचनमा पराजयको गम्भीर समिक्षाको सुरुवात हुनेछ', उनले भनेका छन् ।
प्रतिक्रिया दिनुहोस !
