काठमाडौँ : काठमाडौँको असन र इन्द्रचोक आसपासका भित्री सडकमा आज (मंगलबार) बाट ४ पाङग्रे सवारी साधन प्रवेशमा रोक लगाइएको छ ।
काठमाडौँ महानगरपालिकासँगको समन्वयमा आवागमन सहज बनाउन उक्त क्षेत्रमा ४ पाङग्रे सवारी साधनलाई विहान ७ बजेदेखि बेलुकी ७ बजेसम्म निषेध गरिएको महानगरीय ट्राफिक प्रहरी महाशाखाका प्रहरी नायव उपरीक्षक मुकुन्द मरासिनीले बताए ।
इन्द्रचोकबाट बटु, असन र भेडासिंह जाने चार पाङ्ग्रे गाडीलाई जान निषेध गरिएको हो। यस्तै ठैँटीबाट ज्वालामाई हुँदै असन जाने र ठैँटीबाट सिधै असन जाने चार पाङग्रे गाडीलाई पनि निषेध गरिएको छ । ज्याठा, कमलाक्षी, भोटाहिटी र महाबौद्धबाट असनतर्फ पनि चार पाङ्ग्रे सवारी साधन जान पाउने छैनन् ।
असन-भोटाहिटी सडकखण्डमा भने आजबाट सबै प्रकारका सवारी साधनलाई रोक लगाइएको छ । भेडासिंहबाट नघल बाङगेमुढा र इन्द्रचोकसम्मको सडकलाई पनि २४ सै घण्टा एकतर्फी बनाइएको छ । यसअघि ट्राफिक प्रहरीले ठमेल र पशुपती क्षेत्रका भित्री सडकलाई 'भेइकल फ्री' जोन बनाइसकेको छ ।
प्रतिक्रिया दिनुहोस !
