काठमाडौँः प्रदेश र प्रतिनिधि सभा निर्वाचनमा कांग्रेस पराजित भएपछि पहिलो पटक कोइराला परिवारका तीन नेता एकैठाउँ जुटेका छन् । निर्वाचनमा पराजयको समिक्षामा ढिलाइ भइरहेको अवस्थामा केन्द्रीय समिति बैठकको दुई दिनअघि कोइराला परिवारका तीन सदस्यबीच लन्च बैठक भएको हो ।
कांग्रेस नेतृ सुजाता कोइरालाको मण्डिखाटारस्थित निवासमा कांग्रेस महामन्त्री शशांक कोइराला, नेता शेखर कोइरालासहित लन्च बैठक भएको हो ।
केन्द्रीय समिति बैठक बस्नुअघि तीन नेता जुट्नुलाई कांग्रेसमा अर्थपूर्णरुपमा लिइएको छ । कोइराला परिवारका यी तीन नेताबीच के के कुरा भयो त ?
‘अहिले उहाँहरु तीनैजना निर्वाचनमा कांग्रेसको नमिठो पराजयको समिक्षामा जुट्नु भएको छ । पराजयको कारण खोजी उहाँहरुको प्रमुख प्राथमिकता हो’, नेता शेखर कोइरालका निजी सहायक दिनेशचन्द्र थपलियाले अन्नपूर्ण अनलाइनसँग भने, ‘अहिले पार्टीको नेतृत्वबारे चर्चा नै भएन । उहाँहरु तीनैजनाले केन्द्रीय समिति बैठकमा एउटै मत व्यक्त गर्ने कुरामा सहमति गर्नुभएको छ ।’
निर्वाचनपछि भएको पहिलो भेटलाई कोइराला परिवारले भने पारिवारिक भेट भनेको छ । ‘यद्यपि पारिवारिक भेट भए पनि राजनीतिक कुरामा गम्भीर छलफल भएको छ’, थपलियाले भने, ‘कांग्रेसको हारको समिक्षा अब केन्द्रीय समितिमा हुनुपर्छ । त्यसपछि महासमिति सदस्यहरुको बैठक डाकेर पराजयका कारण खोजी नयाँ ढंगले अघि बढ्नुपर्नेमा उहाँहरुबीच एकमत छ ।’
कांग्रेसमा १२ सय जना भन्दा धेरै महासमिति सदस्य छन् । ती नेताले पराजयबारे एकअर्कालाई आक्षेप लाउने भन्दा संस्थागत रुपमै कारण खोजेर अघि बढ्नुपर्ने साझा धारणा केन्द्रीय समिति बैठकमा राख्ने भएका छन् ।
‘पार्टी संस्थागत रुपमा चल्न सकेन । नेतृत्व पनि कम्जोर हुँदा राष्ट्रिय राजनीतिमा कांग्रेसको भूमिका कम्जोर भयो’, लन्च मिटिङमा उहाँहरुको निचोड यही हो’, थपलियाले भने, ‘अन्तराष्ट्रिय क्षेत्रमा कांग्रेसले आफ्नो छवि गुमाउँदै गयो । सन्तुलित ढंगले कुरा गर्न सकेन । परराष्ट्र नीति कम्जोर भएकाले अब नयाँ शिराबाट बढ्नुको विकल्प रहेन ।’
तीन नेताको छलफलले कांग्रेस पार्टी नभइ झुन्डमा परिणत भएको भन्दै चिन्ता व्यक्त गरेका थिए । पुरानै अवस्थामा फर्र्काएर कांग्रेसलाई हिँडाउन तीनजनाले कहाँ कहाँ के के गर्न सकिन्छ मिलेर काम गर्ने छलफल पनि उनीहरुबीच भएको छ ।
नेतृत्वबारे कुरा भएन
तीन नेताको भेटमा पार्टी नेतृत्व फेर्ने विषयमा कुरा नभएको थपलियाको भनाइ छ । ‘त्यहाँसम्म कुरा पुगेन । तीन कोइरालाको छलफल निर्वाचनको समिक्षा र पार्टीको कम्जोर छविमै केन्द्रित भयो’, थपलियाले अगाडि भने, ‘दुईचारजना बसेर गुटगत भेला गरेर कांग्रेस उँभो लाग्दैन । अब कांग्रेस इस्यु र एजेन्डामा एकमत हुन सक्नुपर्छ भन्ने उहाँहरुको निचोड थियो ।’
प्रतिक्रिया दिनुहोस !
