'प्रदेश ५ को मुकाम सरकारले सच्याउनुपर्छ '
लिबाङ : माओवादी केन्द्रका नेता एवं पार्टीका प्रदेश ५ इन्चार्ज वर्षमान पुन अनन्तले रुकुमपूर्व, बर्दिया र पश्चिम नवलपरासीका जनताको पायक पर्ने ठाउँमा प्रदेश राजधानी हुने गरी निर्णय सच्याउनुपर्ने बताएका छन् ।
सरकारले प्रदेश ५ को अस्थायी मुकाम बुटवल तोकेपछि आन्दोलन चर्किंदै गएको बेला शुक्रबार गृहजिल्ला रोल्पा आएका पूर्वअर्थमन्त्री पुनले सरकारले संघीयता नै नबुझेर प्रदेश मुकाम तोकेको आरोप लगाए । ‘संघीयता भनेको सबै जनताका लागि पायक पर्ने स्थानमा प्रदेश मुकाम र स्थानीय तह लैजाने भन्ने हो । प्रदेश ५ को अस्थायी मुकाम अपायक हुने गरी तोकिएको छ,’ पुनले भने, ‘जनतालाई पायक पर्ने ठाउँ ख्याल गरेर निर्णय सच्याउनुपर्छ । यसका लागि समय छ ।’
रोल्पा नगरपालिकाको लिबाङस्थित वडा नं ४ को नयाँ भवन उद्घाटनमा नेता पुनले संक्रमणकालीन सरकारले संक्रमणकालीन निर्णय गरेको भन्दै व्यंग्यसमते गरे । उनले दाङ प्रदेश राजधानी हुनुपर्नेमा जोड दिँदै उच्च अदालत राखिएको प्रदेश निर्वाचन हुने ठाउँमै मुकाम हुनुपर्ने बताएका छन् । उनले भने, ‘सरकारले गलत निर्णय गरेको छ ।’ प्रदेशस्तरका आयोग, प्रहरी र न्यायलयको संरचना बसिसकेकाले दाङ मुकामका लागि आन्दोलन स्वाभाविक भएको पनि टिप्पणी गरे ।