काठमाडौँः इङ्लिस प्रिमियर लिगअन्तरगत शनिबार राति भएको खेलमा डिफेन्डिङ च्याम्पियन चेल्सीले ब्राइटनविरुद्ध ४–० को फराकिलो जित दर्ता गराएको छ ।
प्रिमियर लिगको २४ औँ चरणको खेलमा ब्राइटनको घरेलु मैदानमा चेल्सीलाई शानदार जित दिलाउने क्रममा इडिन हजार्डले दुई गोल गरेका थिए ।
चेल्सीको जितमा खेलको तेस्रो मिनेटमै हजार्डले गोल गर्दै अग्रता दिलाए । त्यसपछि छैटौँ मिनेटमा ब्राजिलियन मिडफिल्डर विलियनले अर्को गोल गरेपछि चेल्सी २–० ले अघि बढ्यो ।
त्यसपछि चेल्सीले दोस्रो हाफमा २ गोल गर्यो । चेल्सीका लागि ७७ औँ मिनेटमा व्यक्तिगत दोस्रो गोल गर्दै हजार्डले खेललाई ३–० मा पुर्याए । खेलको ८९ औँ मिनेटमा भिक्टोर मोसेसले गोल गरेपछि चेल्सीले ४–० को जित दर्ता गराउन सफल भयो ।
यो जितपछि चेल्सी २४ खेलबाट ५० अंकसहित लिगको तेस्रो स्थानमा कायमै छ । पराजित ब्राइटन भने २४ खेलबाट २३ अंकसहित लिगको १६ औँ स्थानमा छ।
प्रतिक्रिया दिनुहोस !
