खडेरी ‘ओपनिङ’ ब्याट्सम्यानको

काठमाडौं : नेपाली राष्ट्रिय क्रिकेट टोलीमा पछिल्लो समय सबैभन्दा बढी केही परिवर्तन भएको छ भने प्रारम्भिक ब्याट्सम्यानको जोडी हो । सन् २०१० यता सात वर्षको अवधिमा नेपाली राष्ट्रिय टोलीमा प्रारम्भिक ब्याट्सम्यानको जोडी २१ पटक परिवर्तन भएको छ । अन्तर्राष्ट्रिय क्रिकेट काउन्सिल (आईसीसी) डिभिजन दुईको तयारीमा रहेको नेपाली टोली प्रतियोगिताका लागि फेरि नयाँ प्रारम्भिक ब्याट्सम्यानको जोडीको खोजीमा छ ।

खोजी त्यति सजिलो भने छैन । यसपटक पनि तेस्रो क्रमबाट उपकप्तान ज्ञानेन्द्र मल्ललाई नेपाली टोलीको पालि सुरुआत गर्न पठाउनुपर्नेछ । उनलाई दोस्रो ‘इन्ड’बाट बलियो साथ दिनसक्ने अर्काे ब्याट्सम्यानको खोजी गर्नु छ ।

प्रतियोगिताको तयारीस्वरूप हाल बन्द प्रशिक्षणमा रहेका २१ खेलाडीमध्ये प्रारम्भिक ब्याट्सम्यानमा ज्ञानेन्द्रको जोडीका रूपमा दिलीप नाथ वा सुनिल धमलाको सम्भावना छ । यद्यपि यी दुईमध्ये मात्र एक खेलाडीले प्लेइङ ११ मा अवसर पाउने सम्भावना छ । प्रशिक्षक जगत टमाटा बन्द प्रशिक्षण र वैदेशिक प्रशिक्षणमा गरेको प्रदर्शनलाई हेरेर दिलीप र सुनिलमध्ये एक खेलाडीलाई प्रारम्भिक ब्याट्सम्यानका रूपमा खेलाइने तयारी रहेको बताउँछन् । त्यसैले सुनिल र सुनिल धमलामध्ये एकमात्रै खेलाडी अन्तिम १४ भित्र पर्ने सम्भावना छ । अन्तिम १४ भित्र परेको अवस्थामा पनि प्लेइङ ११ मा पर्ने सम्भावना एकको मात्रै छ ।

‘हामी प्रारम्भिक ब्याट्सम्यानका लागि ज्ञानेन्द्रलाई बलियो साथ दिने अर्काे खेलाडीको खोजी गरिरहेका छौं । त्यसका लागि दिलीप र सुनिललाई प्रयास गरिरहेका छौं’, प्रशिक्षक टमाटा भन्छन्, ‘हामीसँग अझै केही दिन छ । यो अवधिमा उनीहरूको प्रदर्शनलाई हेरेर उत्कृष्टमध्ये एकलाई ज्ञानेन्द्रको जोडीका रूपमा खेलाउने छौं ।’

बलरले आवश्यकताअनुसार सहजै टर्न र स्विङ गराउनसक्ने नयाँ बलसँग खेल्नुपर्ने भएकाले प्रारम्भिक ब्याट्सम्यान अनुभवी हुनुपर्नेछ । प्रारम्भिक ब्याट्सम्यानले पिच कन्डिसन बुझेर खेल्न सक्नुपर्छ । प्रारम्भिक ब्याट्सम्यान सुरुआतमै आउट हुँदा टोलीको पालि अघि बढाउन अन्य खेलाडीमा दबाब बढ्नेछ । त्यसैले प्रारम्भिक ब्याट्सम्यानमाथि पिचको व्यवहार बुझेर लामो पालि खेल्नसक्ने क्षमता हुन जरुरी छ । प्रारम्भिक ब्याट्सम्यानले टिकेर लामो पालि खेल्न सकेको अवस्थामा मात्रै टोलीको जित सहज हुनेछ ।

नेपाली क्रिकेटका युवा ब्याट्सम्यानद्वय दिलीप र सुनिलले यसअघि अन्तर्राष्ट्रिय प्रतियोगितामा प्रारम्भिक ब्याट्सम्यानका रूपमा नेपाली टोलीको पालीको सुरुआत गरिसकेका छन् । दिलीप र सुनिल दुवैले ज्ञानेन्द्रकै जोडीका रूपमा खेलिसकेका छन् । यसपटक ज्ञानेन्द्रको जोडी बन्ने प्रतिस्पर्धामा अनुभव र यसअघिका प्रतियोगिताको आधारमा दिलीपभन्दा सुनिल अघि छन् । सुनिलले गत मार्च र अप्रिलमा बंगलादेशमा भएको एसियाली क्रिकेट काउन्सिल (एसीसी) इमर्जिङ टिम्स कपअन्तर्गत पाकिस्तान र बंगलादेशको यू-२३ टोलीविरुद्ध ज्ञानेन्द्रको जोडीका रूपमा नेपाली टोलीको पारिको सुरुआत गरेका थिए । सुनिलले आईसीसी विश्व क्रिकेट लिग च्याम्पियनसिपअन्तर्गत केन्याविरुद्ध भएको दुई खेलमा पनि ज्ञानेन्द्रसँगै प्रारम्भिक ब्याट्सम्यानका रूपमा खेलेका थिए ।

दिलीपले भने विश्व क्रिकेट लिग च्याम्पियनसिपअन्तर्गत संयुक्त अरब इमिरेट्स (यूएई) विरुद्ध हालै भएको खेलमा ज्ञानेन्द्रसँग प्रारम्भिक ब्याट्सम्यानका रूपमा खेलेका थिए । टीट्वेन्टी फम्र्याटकै भए पनि हालै भएको एभरेस्ट प्रिमियर लिग (ईपीएल) क्रिकेटमा दिलीपको भन्दा सुनिलको प्रदर्शन राम्रो थियो । यद्यपि यी दुई खेलाडीबीचको छनोटको आधार मैदानभित्रको अन्य जिम्मेवारी पनि हुन सक्नेछ ।

यसपटक लामो समयदेखि टोलीमा रहँदै आएका सागर पुनसँगै विनोद भण्डारी पनि टोलीबाट बाहिरिएका छन् । विनोद टोलीमा नपर्दा विकेट किपरको कमी भएको छ । विनोदको अनुपस्थितिमा विकेट किपरका लागि विकल्प दिलीप नै हुन् । प्रारम्भिक ब्याट्सम्यानको भूमिकामा उनी तयार नभए विकेट किपरको जिम्मेवारी ज्ञानेन्द्रले सम्हाल्ने गरी सुनिलले टोलीको पालि सुरुआत गर्ने सम्भावना छ । ज्ञानेन्द्रले सिनियर राष्ट्रिय टोलीबाट विकेट किपिङ गरेका छैनन्, यद्यपि उनी त्यो भूमिकाका लागि पनि तयार छन् । यसरी दिलीप बाहिरिए टोलीसँग विकेट किपर एकजना मात्रै हुनेछ । यो अवस्थामा कुनै कारणवश ज्ञानेन्द्र खेल्न नसक्ने भए टोलीमा विकेट किपर नहुन पनि सक्नेछ ।

नेपाली टोलीको मध्य क्रमका ब्याट्सम्यान र राम्रा बलर रहेकाले यी दुवै खेलाडीलाई टोलीमा समावेश गर्न पनि मुस्किल छ । नेपाली टोलीको मध्य क्रममा कप्तान पारस खड्का र शरद भेषावकर बलिया खम्बा छन् । त्यसपछि युवा ब्याट्सम्यान दीपेन्द्रसिंह ऐरी र आरिफ सेखले पनि मध्य क्रम लिनेछन् । यी दुवै खेलाडीबाट नेपाली टोलीले बलिङको फाइदा पनि लिन सक्नेछ । दीपेन्द्र र आरिफ दुवै मिडियम पेसर हुन् ।

यू-१९ राष्ट्रिय टोलीबाट आएका रोहित पौडेल, अनिलकुमार शाह लगायतका खेलाडीले पनि अन्तिम १४ का लागि बलियो दाबेदारी प्रस्तुत गर्न सक्नेछन् । त्यसमाथि बलरको ‘कोटा’ थप्दा प्रारम्भिक ब्याट्सम्यानका रूपमा अन्तिम १४ मा दिलीप र सुनिलमध्ये एकको मात्रै अवसर देखिएको छ । अन्तिम १४ मा दुवै खेलाडी परे पनि प्लेइङ ११ मा दुवै खेलाडी पर्ने सम्भावना कम छ ।