गरिफालाई हराउँदै मनाङ्ग इटहरी गोल्डकपको फाइनलमा
इटहरी: कोलकाताको गरिफा स्पोर्टिङ क्लबलाई ० का विरुद्ध ३ गोलले पराजित गर्दै मनाङ मर्स्याङ्दी क्लब मदन भण्डारी स्मृति इटहरी गोल्डकपको फाइनलमा पुगेको छ । शनिबार हुने फाइनल खेलमा मनाङ थ्री स्टारसँग भिड्नेछ ।
इटहरीको क्षेत्रीय रंगशालामा बिहीबार भएको दोस्रो सेमिफाइनल खेलमा गरिफालाई मनाङ्गले पराजित गरेको हो । प्रतिष्पर्धात्मक पहिलो हाफको निर्धारित समयमा दुबै टिमबाट गोल हुन सकेन ।
दोस्रो हाफमा भने मनाङका लागि खेलको २ मिनेटमै सन्तोष साहुखालले गोल गरेका थिए भने २२ औं मिनेटमा उनले अर्को गोल थपेका थिए । खेलको ३० औं मिनेटमा मनाङ्गको तर्फबाट विमल रानाले गोल गरे । खेलको म्यान अफ द म्याच मनाङका सन्तोष साहुखाल घोषित भए ।
नेपालमै अहिलेसम्मको सबैभन्दा धेरै पुरस्कार राशीको मदन भण्डारी इटहरी गोल्डकप प्रतियोगिताका विजेताले १२ लाख नगदसहित ८० तोलाकोे चाँदीको कपमा अढाई तोला सुनको मदन भण्डारीको लोगो राखिएको कप पाउने छ भने उपविजेताले ६ लाख रुपैया पाउने छ ।
प्रतियोगिताको सर्वोत्कृष्ट खेलाडीले २५ हजार नगद सहित ३२ इन्चको टिभी, प्रत्येक खेलको म्यान अफ द म्याच १० हजार र विभिन्न विधामा उत्कृष्ट खेलाडीले नगद २० हजार पाउनेछन् ।
प्रतिक्रिया दिनुहोस !
