रुकुम पूर्वमा सदरमुकाम सार्ने निर्णयविरुद्ध प्रदर्शन

रुकुमकोट : नयाँ जिल्लाको रुपमा थपिएको रुकुम पूर्वको प्रस्तावित सदरमुकाम भनिएको रुकुमकोटबाट रुकुम पूर्वको पुथा उत्तरगंगा गाउँपालिका-१२ गोलखाडामा सार्ने गरी बिहीबार बसेको मन्त्रिपरिषद्ले गरेको  निर्णको विरोधमा रुकुमकोट र आसपासका स्थानीय बिहीबार रातिदेखि नै विरोधमा उत्रिएका छन् ।

सदरमुकाम सार्ने निर्णय भएलगत्तै सदरमुकाम रुकुमकोट नै उपयुक्त हुने भन्दै सरकारले गरेको निर्णयले रुकुम पूर्वका जनतालाई अन्याय भएको भन्दै रातिदेखि रुकुमकोटमा विरोध पर्दशन सुरु भएको हो । स्थानीय हरिकृष्ण गौतमका अनुसार सरकारको निर्णयको विरोधमा रुकुम पूर्वमा आम हड्ताल घोषणा गरिएको छ । विरोध पर्दशनसँगै जिल्लामा रहेका सबै सरकारी कार्यालयमा तालावन्दी गरिएको छ। प्रर्दर्शनकारीले प्रधानमन्त्री देउवाको पुत्ला दहन गरेका छन् । सरकारले गरेको निर्णयको विरोधमा स्थानीय जनप्रतिनिधिसमेत सहभागी भएका छन् ।

रुकुम पूर्व जिल्लामा पुथा उत्तरगंगा गाउँपालिका, भुमे गाउँपालिका र सिस्ने गाउँपालिका गरी तीन वटा स्थानीय तह रहेका छन् । हाल सदरमुकाम रहेको रुकुमकोट सिस्ने गाउँपालिका वडा नं. ५ र ६ मा पर्छ भने सरकारले निर्णय गरेको पुथा उत्तरगंगा गाउँपालिका-१२ साविक कोल गासविसको वडा नं. २ मा पर्छ।

रुकुम जिल्लाको पुरानो सदरमुकाम रुकुमकोट रहेकोमा २०३० सालमा हाल रुकुम पश्चिमको सदरमुकाम रहेको मुसीकोटमा सारिएको थियो । त्यसपछि रुकुम दुई भागमा बाडिएपछि रुकुम पूर्वको सदरमुकामकारुपमा रुकुमकोटलाई प्रस्ताव गरी बिभिन्न सरकारी कार्यालय स्थापाना गरी अन्य भौतिक पूर्वाधारको निर्माणसमेत थालिएको थियो ।