क्रिकेट सामग्री हस्तान्तरण
काठमाडौं : पोखराको राइजिङ पोखरा क्रिकेट एकेडेमीलाई खेल सामग्री हस्तान्तरण गरिएको छ । पुष्पतारा केडिया सेवा संस्थानद्वारा आयोजित कार्यक्रममा नेपाली राष्ट्रिय टोलीका ब्याट्सम्यान शरद भेषावकरले एकेडेमीलाई बल, ब्याटलगायत सामग्री हस्तान्तरण गरेका हुन् । शरदले बृज सिमेन्ट इन्डस्ट्रिजद्वारा प्रायोजित खेल सामग्री एकेडेमीलाई हस्तान्तरण गरेका हुन् ।
राष्ट्रिय टोलीका भरपर्दा खेलाडी शरद बृज सुपर प्रिमियम ओपीसी सिमेन्टका ब्रान्ड एम्बेसडरसमेत हुन् । गत वर्ष स्थापना भएको एकेडेमीमा ३० युवा खेलाडीले क्रिकेट सिक्दै आइरहेका छन् । शरदले युवा खेलाडीहरूका लागि खेल सामग्री उपलब्ध गराउन पाउँदा खुसी लागेको प्रतिक्रिया दिए । ‘नेपालमा पछिल्लो समय क्रिकेट क्रेज बढिरहेको छ ।
त्यससँगै क्रिकेटका प्रतिभाहरू पनि आइरहेका छन्’, शरदले भने, ‘केही प्रतिभा खेल सामग्री जुटाउन नसक्दा यत्तिकै खेर गइरहेका पनि छन् । यी खेल सामग्री यहाँका युवा खेलाडीलाई आफ्नो क्षमतामा निखार ल्याउन महत्वपूर्ण हुने अपेक्षा गरेको छु ।’ खेल सामग्री हस्तान्तरण कार्यक्रममा पोखरा उद्योग वाणिज्य महासंघका अध्यक्ष विश्व पालिखे लगायतको उपस्थिति थियो ।
प्रतिक्रिया दिनुहोस !
