छथरका सरकारी कार्यालयमा सिसी टिभी र विद्युतीय हाजिरी

तेह्रथुम : छथर गाउँपालिकाले सबै सरकारी कार्यालयमा विद्युतीय हाजिरी मेसिन र सिसी टिभी जडान गरेको छ । गाउँपालिका कार्यालयसहित सेवा क्षेत्र भित्रका विद्यालय, स्वास्थ्य चौकी र वडा कार्यालयहरुमा विद्युतीय हाजिरी मेसिन जडान गरिएको बताइएको छ ।

सुशासन अभिवृद्धि, शैक्षिक गुणस्तरमा सुधार तथा नियमित अनुगमनलाई व्यवस्थित गर्न गाउँपालिका कार्यालयमा सिसी टिभी तथा विद्युतीय हाजिरी जडान गरिएको अध्यक्ष सन्तवीर लिम्बुले बताए । गाउँपालिका कार्यालयका सबै शाखा र कोठामा सिसी क्यामेरा जडान गरिएको छ । ती सबै काम र गतिविधिको प्रत्यक्ष निगरानी गाउँपालिका अध्यक्षको कोठाबाट गरिन्छ । यस्तै गाउँपालिकाले सेवा क्षेत्रका नौ वटा माध्यमिक विद्यालय, ६ स्वास्थ्य चौकी र सात वटै वडा कार्यालयमा विद्युतीय हाजिरी मेसिन जडान गरिएको प्रवक्ता राजन नेपालीले बताए ।

विद्युतीय हाजिरी जडानपछि शिक्षकहरु नियमित विद्यालयमा उपस्थित भए नभएको अनुगमन गर्न सहज हुने भएको छ । यसले सरकारी विद्यालयप्रतिको विकर्षण हटाउन सजिलो हुने आशा गरिएको छ ।

विद्युतीय हाजिरी जडानपछि कर्मचारीहरु ढिलोगरी कार्यालय आउने, मनपरी विदा लिने जस्ता समस्या सुल्झिने समेत आशा गरिएको छ । गाउँपालिकालाई प्रविधिमैत्री बनाउने अभियान अन्तर्गत विद्युतीय हाजिरी र सिसी टिभीको स्थापना गरिएको गाउँपालिकाको जनायो । दुई नगरपालिका र चार गाउँपालिका रहेको जिल्लामा छथरले पहिलो पल्ट यो अभ्यासको थालनी गरेको बताइएको छ ।