भारतीय दूतावासको भोजमा किन गएनन् ओली ?
काठमाडौँ । दक्षिणी छिमेकी मुलुक भारतले शुक्रबार भव्य समारोहबीच ६९ औँ गणतन्त्र दिवस मनाएको छ । नयाँदिल्लीस्थित राजपथमा भव्य कार्यक्रमसहित गणतन्त्र दिवस मनाएको हो ।
नेपालसहित विश्वभरका भारतीय दुतावासमा पनि गणतन्त्र दिवस मनाइएको छ । नेपालस्थित भारतीय दूतावासले गरेको कार्यक्रममा प्रधानमन्त्री शेरबहादुर देउवासहितका उच्च पदस्थ नेताहरु सहभागी भए ।
तर भावी प्रधानमन्त्रीका रुपमा रहेका एमाले अध्यक्ष केपी शर्मा ओली भने दूतावासले गणतन्त्र दिवसका लागि दिएको निम्तो छल्दै पोखरा पुगेका छन् । उनले त्यहाँ सामुदायिक रेडियो प्रसारक संघको १३ औँ वार्षिक साधरणसभालाई सम्बोधन गर्दै देउवा सरकारको कडा आलोचना गरे ।
ओलीको सचिवालयका अनुसार यसअघि नै निर्धारित भइसकेको कार्यक्रमलाई सम्बोधन गर्न ओली पोखरा पुगेका हुन् । त्यहाँको कार्यक्रमलाई सम्बोधन गरेर ओली काठमाडौँ फर्किने कार्यक्रम छ ।
गत वर्ष भारतीय दूतावासले गरेको गणतन्त्र दिवसको कार्यक्रममा पनि ओली सहभागी भएका थिएनन् । तर, अन्य शीर्ष नेताहरु भने त्यो कार्यक्रममा पुगेका थिए ।
पढ्नुस्: प्रधानमन्त्री बन्न लागेकोमा ओलीलाई मोदीको बधाई
एक सातअघि मात्रै भारतीय प्रधानमन्त्री नरेन्द्र मोदीले ओलीलाई भावी प्रधानमन्त्रीका रुपमा फोन गरेर बधाई दिएका थिए । उनले ओलीलाई भारत भ्रमणको निम्तो पनि दिएका थिए । प्रत्युत्तरमा ओलीले पहिले मोदीलाई नेपाल आउन आग्रह गर्दै मुक्तिनाथ र जनकपुर घुमाइदिने उल्लेख गरेका थिए ।
ओलीका प्रेस संयोजक चेतन अधिकारीले अध्यक्ष ओली शुक्रबारै पोखराबाट काठमाडौँ फर्किन लागेको बताउँदै राजधानी आएपछि उनी कुनै कार्यक्रममा सहभागी हुने योजना नरहेको जानकारी दिए ।
कुन् कुन् नेता पुगे दूतावास ?
लैनचौरस्थित भारतीय दूतावासमा गरिएको गणतन्त्र दिवसको प्रमुख अतिथिकारुपमा उपराष्ट्रपति नन्दबहादुर पुन पुगेका थिए । त्यसैगरी प्रधानमन्त्री शेरबहादुर देउवा पनि अतिथिका रुपमा पुगेर औपचारिक कार्यक्रम तथा दिवा भोजमा सहभागी भए ।
दूतावासको कार्यक्रममा पुगेका नेपालका शीर्ष नेताहरु । तस्बिर: रासस
पढ्नुस्: मोदीको बधाई :चुनाव गराएकोमा देउवालाई, जितेकोमा ओली र दाहाललाई
त्यसैगरी यो कार्यक्रममा पू्र्वप्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्ड, अर्का पूर्वप्रधानमन्त्री तथा नेकपा एमालेका नेता माधवकुमार नेपाल र पूर्वप्रधानमन्त्री तथा नयाँ शक्ति पार्टीका संयोजक डा. बाबुराम भट्टराई पनि सहभागी भए ।
दूतावासको भोजमा पूर्वउपप्रधानमन्त्री तथा कांग्रेस नेता विजय गच्छदार र बहालवाला उपप्रधानमन्त्री गोपालमान श्रेष्ठ पनि सहभागी भए । कार्यक्रममा अभिनेत्री मनीषा कोइराला पनि सहभागी भइन्।
ओलीले पोखरामा के भने: देउवाका निर्णय उल्टाउँछौँ : ओली
त्यसैगरी दूतावासले शीर्षस्थ मधेसवादी नेताहरुलाई पनि बोलाएको थियो । उनीहरु पनि दिवा भोज कार्यक्रममा सहभागी हुन दूतावास पुगेका छन् ।
दूतावासले गरेको दिवा भोजमा प्रम ओलीबाहेक दलका शीर्ष तथा दोस्रो तहका नेताहरु पनि सहभागी भएका छन् । भावी प्रम तथा एमाले अध्यक्ष ओलीले भने दुतावासको निम्तो आएर पनि सामुदायिक रेडियको कार्यक्रममा सहभागी हुन सचिवालयका केही सदस्यसहित पोखरा हिँडेका थिए ।