ओली-दाहाल गोप्य छलफलमा
काठमाडौं : एमाले नेता सुवास नेम्बाङ संयोजकत्वको कार्यदलको ब्रिफिङपछि एमाले अध्यक्ष केपी ओली र माओवादी केन्द्रका अध्यक्ष पुष्पकमल दाहाल शुक्रबार गोप्य छलफलमा बसेका छन् । पार्टी एकता ‘निर्णायक मोड’ मा पुगेको भन्दै ओली र दाहाल ‘वान टु वान’ वार्तामा बसेको ओलीनिकट स्रोतले जानकारी दियो ।
पोखराबाट फर्किएलगत्तै ओली निवासमा कार्यदलका संयोजक नेम्बाङ र माओवादी केन्द्रका नेता रामबहादुर थापाले ओली र दाहाललाई कार्यदलको ‘ब्रिफिङ’ गरेका थिए ।
कार्यदलले प्रदेशका मुख्यमन्त्री र सभामुखको बाँडफाँटबारे भएको प्रगतिको जानकारी गराएको थियो । ‘हामीले कार्यदलको ब्रिफिङ गर् यौं र त्यसपछि नेताहरू गोप्य छलफलमा जुट्नुभयो,’ संयोजक नेम्बाङले भने ।
पार्टी एकताबारे ओली र दाहालबीच गत शुक्रवार ४ घण्टा लामो वार्ता भएको थियो । त्यसको भोलिपल्ट पनि दुई नेताबीच छलफल भएर राष्ट्रियसभाको उम्मेदवारी दर्तापछि पुनः छलफलमा जुट्ने सहमति भएको थियो ।
प्रतिक्रिया दिनुहोस !
