प्रदेश ५ को संसद् बैठक माघ २१ मा

बुटवल : प्रदेश नम्बर ५ को पहिलो संसद् बैठक माघ २१ गते बस्ने भएको छ । शपथग्रहण भएको एक सातापछि प्रदेश प्रमुख उमाकान्त झाले प्रदेश बैठक आह्वान गरेका हुन् । संवैैधानिक व्यवस्थाअनुसार माघ २३ गतेभित्रै संसद् बैठक बोलाउनुपर्छ । संसद् बैठक आह्वानका लागि प्रमुख उमाकान्त झाले संसद्मा प्रतिनिधित्व गर्ने ६ वटा दलसँग परामर्श गरेका छन् । प्रदेश ५ मा एमाले, माओवादी, कांग्र्रेस, संघीय फोरम, राजपा र जनमोर्चाको संसद्मा प्रतिनिधित्व छ।

संविधानकै सीमाभित्र रहेर बैठक आह्वान भएको प्रदेश सचिव सनत दुवाडीले जानकारी दिए । ‘माघ २१ गते पहिलो बैठक बस्नेछ । त्यसको तयारी सुरु भइसकेको छ’, उनले भने । संसद् बैठक आह्वानका लागि प्रदेश कार्यालयले सार्वजनिक सूचना जारी गरेको छ । पहिलो बैठक शपथग्रहण भएकै स्थान बुटवल उद्योग वाणिज्य संघको सभाहलमा हुने भएको छ । संसद्को अध्यक्ष ज्येष्ठ सदस्य बलदेश शर्मा पोखरेलले गर्नेछन् । ७९ वर्षीया शर्मा कांग्रेसबाट समानुपातिक सांसद हुन् ।

संसद् बैैठक बस्ने भवन व्यवस्थापनको काम आइतबारबाट सुरु हुँदै छ । प्रादेशिक कार्यालयका लागि भवन व्यवस्थापन गर्न बनेको स्थानीय समितिका संयोजक रुपन्देहीका प्रमुख जिल्ला अधिकारी हरिप्रसाद मैनालीले बुटवल उद्योग वाणिज्य संघको सभाहलमा बैठक कक्ष निर्माण हुने बताए । बैठक कक्ष कस्तो निर्माण गर्ने भन्ने विषयमा संसद् सचिवालयले खाका पठाएको छ । अधिकांश संरचना सातै प्रदेशमा एकैखालको भए पनि भवनको आकृतिका आधारमा केही परिवर्तन हुने बताइएको छ । प्रदेश ५ को सभाकक्ष निर्माण गर्न भवन डिभिजन रुपन्देहीले काम गर्ने प्रजिअ मैनालीले जानकारी दिए । सात दिनभित्रै सभामुख बस्ने रोस्टमसहितका अन्य संरचना निर्माण गर्न चुनौैती देखिएको छ । प्रदेशमा रहेका ८७ जना सांसद सहित, कूटनीतिक नियोगका व्यक्ति, पत्रकार बस्ने कक्षसमेत निर्माण हुनेछन् । प्रदेश ५ मा संसद बैठकको भवन टुंगो लागे पनि अन्य कार्यालय कुन भवनमा राख्ने अझै टुंगिएको छैन ।

मुख्यमन्त्रीको कार्यालयका लागि तीन वटा भवन सिफारिस गरिएको छ । श्रम कार्यालयको ६ तले भवन, नापी कार्यालय र अनुसन्धान कार्यालयको भवनमध्ये एउटामा मुख्यमन्त्रीको कार्यालय र निवास हुनेछ । ‘मुख्यमन्त्री कार्यालयका सचिवले कुन भवन उपयुक्त हुन्छ भन्ने टुंग्याउनुहुनेछ’, प्रजिअ मैनालीले भने । यी भवनमा अन्य मन्त्रालय पनि व्यवस्थापन गर्न सकिनेछ । संसद् बैठक आह्वान भए पनि प्रदेशमा पर्याप्त कर्मचारी आइसकेका छैनन् । अस्थायी मुकाम बुटवलमा प्रदेश प्रमुख उमाकान्त झासहित तीन जना मात्रै छन् । संसद् सञ्चालन गर्न संसद् सचिवालयबाट कर्मचारी आउने बताइएको छ ।