काठमाडौँः राष्ट्रिय सभामा प्रदेश नम्बर ३ का माओवादी केन्द्रका उम्मेदवार रामबहादुर थापा बादल असुरक्षित बनेपछि एमाले उम्मेदवार बेदुराम भुसालले पछि हट्नुपर्ने भएको छ ।
प्रदेश ३ बाट खुलाबाट ३ जनाको कोट रहेको अवस्थामा चारजनाको उम्मेदवारी परेपछि बादलका लागि वाम गठबन्धनले एमाले नेता बेदुराम भुसालको उम्मेदवारी फिर्ता गराउने सहमति गरेको हो ।
सोमबार बिहान सिंहदरबारमा बसेको वाम गठबन्धनको बैठकमा एमाले नेता माधवकुमार नेपाललाई मनाएर बादललाई राष्ट्रिय सभामा पठाउन बेदुरामको उम्मेदवारी फिर्ता गराउन लागिएको हो ।
राष्ट्रिय सभाका लागि एमालेले वामदेव गौतमनिकट बलराम बास्कोटा र माधव नेपालनिकट बेदुराम भुसाललाई उम्मेदवार बनाएको छ । यही तीनवटा कोटामा माओवादी केन्द्रबाट रामबहादुर थापा बादल उम्मेदवार बनेका छन् ।
अर्कातिर विवेकशील–साझा पार्टीसहितको समर्थनमा कांग्रेसबाट राधेश्याम अधिकारी पनि चुनावी मैदानमा छन् । साना दलले समर्थन गरेकाले वामले २ जना मात्रै जित्ने पक्का पक्की छ । यो अवस्थामा वामबाटै तीनजना उम्मेदवार भएपछि बादललाई बचाउन बेदुरामले पछि हट्नुपर्ने भएको हो ।
बादलले भनेः म नै हट्छु
वाम गठबन्धनको बैठकमा माओवादी नेता बादलले कुरा नमिल्ने हो भने आफैँले उम्मेदवारी फिर्ता लिने बताएपछि नेताहरु झस्किएका थिए । ‘तपाईँहरुलाई समस्या हुन्छ भने म नै उम्मेदवारी फिर्ता लिन्छु’, बैठकमा बादलको भनाई उधृत गर्दै एक नेताले भने, ‘मेरा कारण समस्या नहोस् भन्ने चाहना हो । म वाम गठबन्धनलाई अफ्ठेरो पार्दिनँ ।’
बादलले यसो भनेपछि वाम गठबन्धनका दुई नेता केपी ओली र पुष्पकमल दाहाल प्रचण्डले एमालेका वरिष्ठ नेता माधवकुमार नेपाललाई मनाउने कोशिश गरेका थिए । वाम गठबन्धनबाट तीनजना उम्मेदवार बनेकाले एमालेबाट अन्तर्घात हुँदा बादल हार्ने देखेपछि माओवादी अध्यक्ष प्रचण्डले सोमबारको बैठकका लागि ओलीलाई आग्रह गरेका थिए । जहाँ दुवै नेताले बेदुरामलाई फिर्ता गर्न नेता नेपाललाई मनाएको स्रोतले जनाएको छ ।
राष्ट्रिय सभाको उम्मेदवारी प्राथमिकता क्रममा पहिलो नम्बरमा वामदेवनिकट एमाले नेता बासकोटा छन् भने दोस्रोमा बादल । तर एमालेबाट नेपालपक्षले बेदुरामलाई पहिलो प्राथमिकताको मत हाल्ने बुझेपछि माओवादीले बेदुरामको उम्मेदवारी फिर्ता लिएर बादललाई सुरक्षित गर्नुपर्ने अडान राखेको थियो ।
वाम गठबन्धनका तीनै नेताले जित्नका लागि नेपाल मजदुर किसान पार्टीसहितका साना दलले सघाउनुपर्ने हुन्छ । तर, विवेकशील–साझासहितले कांग्रेसका राधेश्याम अधिकारीलाई सघाएका छन् । स्रोतका अनुसार नेमकिपासहितका साना दलले वामको पक्षमा मत नहाल्ने जनाउ दिएकाले आजै २ बजेसम्ममा बेदुरामको उम्मेदवारी फिर्ता हुनेछ ।
प्रतिक्रिया दिनुहोस !
