'एमाले-माओवादी केन्द्र एकतामा ७०/३० को भागवण्डा'
चितवन: नेकपा एमालेका स्थायी समिति सदस्य तथा पार्टी एकीकरण संयोजन समितिका सदस्य सुरेन्द्र पाण्डेले पार्टी एकीकरण भन्दा अघि सरकार गठन हुने बताएका छन् ।
सोमबार भरतपुरमा प्रेस चौतारी चितवनले आयोजना गरेको पत्रकार सम्मेलनमा बोल्दै नेता पाण्डेले सरकार गठनअघि पार्टी एकिकरण सम्भव नरहेको बताएका हुन् ।
पुर्व अर्थमन्त्री समेत रहेका पाण्डेले सरकार गठनलगत्तै पार्टी एकीकरण हुने दाबी गरे । दुई पार्टीबीच अहिलेसम्म विमति नरहेको भन्दै पाण्डेले पार्टी एकीकरण पनि सहजै जिकिर गरे ।
पार्टी एकीरणमा सहमती भइसके पनि दुई पार्टीको प्रकृयागत र संवैधानिक कुराले ढिलो हुनसक्ने पाण्डेले बताए । राष्ट्रिय सभाको निर्वाचनपछि पार्टी एकीकरण र केन्द्रीय सरकार निर्माणमा केन्द्रित हुने उनले बताए ।
प्रतिनिधि र प्रदेश सभाको निर्वाचनमा ६०/४० को भागवण्डा भएपनि चुनावी परिणम अनुसार प्रदेशमा ७०/३० को भागवण्डा गरिएको पाण्डेले उल्लेख गरे । 'राष्ट्रिय सभा र प्रदेशको सिट बाँडफाँट ७०/३० प्रतिशतको आधारमा गरिएको छ', उनले भने, 'पार्टी एकीकरण ७०/३० कै अनुपातमा हुनेछ ।' दुई पार्टीको एकताका लागि अन्य आधार पनि बनाइसकिएको उनले प्रष्ट पारे ।
प्रदेशको मन्त्री र सभामुख स्थायी कमिटिले तोक्ने अथवा संसदमा निर्वाचन गरेर टुंग्याइने उनेले बताए । 'अहिलेसम्म व्यक्तिको टुंगो लागेको छैन', उनले भने, 'प्रदेशका मन्त्री र संसदीय समितिको प्रमुख दुई पार्टीको संसदीय दलको नेता र मुख्यमन्त्रीले टुंगो लगाउँछन् ।'
अर्को प्रसंगमा पाण्डेले निर्वाचनमा हारिसकेको कांग्रेस नेतृत्वको सरकारले दुरगामी प्रभाव पार्ने निर्णय गर्नु लोकतान्त्रिक पद्धतीविपरित भएको बताए । काम चलाउ सरकारले पहिलो पटक यस्तो काम गरेको पनि दाबी गरे ।
'लोकतन्त्रमा पराजितहरुले गरेका कामले गम्भीर दुष्परिणाम ल्याउँछ', चेतावनी दिँदै पाण्डेले भने । प्रदेश राजधानी नपाए पनि चितवनलाई देशकै नमुना र आर्थिक केन्द्र बनाउने उनले प्रष्ट पारे ।