प्रदेश ५ बाट राष्ट्रिय सभामा तीनजना निर्विरोध
घोराही: प्रदेश नं ५ बाट राष्ट्रिय सभा सदस्यमा तीनजना निर्विरोध निर्वाचित भएका छन् । ५ नम्बर प्रदेश राष्ट्रिय सभा निर्वाचन अधिकृतको कार्यालयले प्रदेशबाट राष्ट्रिय सभा सदस्यमा ३ महिला उम्मेद्वार निर्विरोध निर्वाचित भएको जनाएको छ ।
निर्वाचन अधिकृत हेमन्त रावलले एमालेका तर्फबाट उम्मेद्वारी दिएका कोमल वली र मिना बुढा तथा नेपाली कांग्रेस उम्मेद्वार अनिता देवकोटाको नाममा कसैको दाबी विरोध नपरेपछि निर्विरोध भएका हुन् । तीन महिला सदस्यका लागि तीनजनाको मात्रै उम्मेद्वारी परेकाले उनीहरु निर्विरोध भएका हुन् ।
घोषणा कार्यक्रममा निर्वाचन कार्यालय परिसरमा रहेकी कांग्रेस नेतृ अनिता देवकोटालाई निर्बाचन अधिकृत हेमन्त रावलले अबिर, टीका र खादा समेत लगाइ दिएका थिए ।
निर्विरोध निर्वाचित हुने राष्ट्रिय सभा सदस्य कोमल वली एमालेमा प्रतिनिधि सभाको निर्वाचनको समयमा राप्रपा त्यागेर प्रवेश गरेकी थिइन् । उनी रेडियो नेपालबाट राजीनामा दिएर सक्रिय राजनीति गर्ने भन्दै राप्रपाको केन्द्रीय सदस्य समेत बनेकी थिइन् ।
त्यस्तै कांग्रेसबाट राष्ट्रिय सभा सदस्यमा निर्विरोध अनिता देवकोटा निवर्तमान सांसद हुन् । यसअघि उनी समानुपातिकबाट सासद भएकी थिइन् ।
बाँकी रहेका ५ सदस्यका लागि ८ जनाको उम्मेद्वारी परेकाले निर्वाचन माघ २४ गते हुनेछ । उनीहरु सबै पार्टीका उम्मेद्वार भएकाले पार्टीकै चुनाब चिन्न प्रदान गरिएको निर्वाचन कार्यालयले जनाएको छ ।
५ नं प्रदेशमा ३ सय ५ मतदाता रहेका छन् । मत भार ८१ सय रहेको छ । प्रदेशमा १२ जिल्लाका १ सय ९ स्थानीय तह र ८७ जना प्रदेश सभा सदस्यहरु रहेका छन ।
प्रतिक्रिया दिनुहोस !
