राष्ट्रियसभा: २४ निर्विरोध, बाँकी ३२ सिटमा ५२ प्रतिस्पर्धी
काठमाडौँ: राष्ट्रियसभा सदस्यको यही माघ २४ गते हुने निर्वाचनमा उम्मेदवारी दिएकामध्ये पाँच राजनीतिक दलका २४ उम्मेदवार निर्विरोध निर्वाचित भएका छन् ।
निर्वाचन आयोगका अनुसार नेकपा एमालेका नौ, नेपाली कांग्रेसका आठ, नेकपा माओवादी केन्द्र का तीन र संघीय समाजवादी फोरम नेपाल राष्ट्रिय जनता पार्टी नेपालका दुई दुई उम्मेदवार निर्विरोध भएका हुन् ।
३२ सिटका लागि ५२ जनाले आगामी २४ गते बुधबार हुने चुनावी प्रतिस्पर्धामा सहभागी हुने भएका छन् । गत १० गते उम्मेदवारी दर्ता हुँदा ५६ सिटका लागि ८३ जनाले उम्मेदवारी दर्ता गरेका थिए । जसमा ७ जनाले उम्मेदवारी फर्ता लिएका छन् । राष्ट्रियसभा सदस्य निर्वाचनमा उम्मेदवारी दिएका ८२ मध्ये २४ जना निर्विरोध भएपछि बाँकी ५२ जना ३२ पदका लागि चुनावी प्रतिस्पर्धामा छन् ।
निर्विरोध हुने एमाले उम्मेदवारमा परशुराम मेघी गुरुङ, हरिचरण शिवाकोटी, नैनकला ओझा, सुमनराज प्याकुरेल, कोमल ओली, मीना बुढा, शेरबहादुर कुँवर, इन्दु कडरिया र कमलाकुमारी ओली छन् ।
त्यस्तै कांग्रेसका तर्फबाट उम्मेदवार भएकामध्ये रमेशजंग रायमाझी, सरिता प्रसाईं, जीतेन्द्रनारायण देव, मुक्ताकुमारी यादव, प्रकाश पन्थी, अनिता देवकोटा, बद्री पाण्डे र तारादेवी भट्ट राष्ट्रियसभा सदस्यमा निर्विरोध निर्वाचित भएका छन् ।
आयोगका अनुसार माओवादी केन्द्रका तर्फबाट वीना पोखरेल, शशीकला दाहाल र हरिराम चौधरी निर्विरोध भएका छन् । फोरमका रामपुत पासवान र प्रमिला कुमारी तथा राजपाका रमेशप्रसाद यादव र वृषेशचन्द्र लाल राष्ट्रियसभा सदस्यमा निर्विरोध निर्वाचित भएको आयोगका प्रवक्ता नवराज ढकालले जानकारी दिए ।
कहाँबाट को निर्वाचित
प्रदेश नम्बर १
यहाँ महिला ३ र अन्य ३ गरी ६ जना उम्मेदवार निविरोध निर्वाचित भएका छन् । प्रदेश नं. १मा निर्विरोध निर्वाचित हुनेमा नेपाली कांग्रेसका रमेशजंग रायमाझी, एमालेका परशुराम मेधी गुरुङ र हरिचरण शिवाकोटी, महिलातर्फ कांग्रेसका सरिता प्रशाई, एमालेका नैनकला ओझा र माओवादी केन्द्रका बीना पोखरेल रहेका छन् । प्रदेश नम्बर २ मा ८ वटै पदका उम्मेदवार निर्विरोध निर्वाचित भएका छन् ।
प्रदेश नम्बर २
नेपाली कांग्रेसका जितेन्द्र देव, एमालेका सुमनराज प्याकुरेल र राजपाका रमेशप्रसाद यादव, महिलाबाट कांग्रेसकी मुक्ताकुमारी यादव, फोरमकी प्रमिला कुरमारी र माओवादीकी शशीकला दाहाल, अल्पसंख्यकबाट राजपाका वृषेशचन्द्र लाल र दलित कोटाबाट फोरमका रामप्रित पासवान निर्विरोध भइसकेका छन् । प्रदेस नं. २मा आँठै पदमा निर्विरोध निर्वाचि भएभने, ६ नं. प्रदेशमा एकजना पनि निर्विरोध निर्वाचित भएनन् ।
प्रदेश नम्बर ३
यहाँ ८ वटै पदमा मतदान हुने भएको छ । १७ जनाले उम्मेदवारी दिएकोमा तीन जनाले उम्मेदवारी फिर्ता लिए । फिर्ता लिनेमा एमालेका वेदुराम भुषाल, माओवादीका गंगापराजुली र राप्रपाका लक्ष्मी रुचाल रहेका छन् ।
प्रदेश नम्बर ४
१४ जना चुनावी प्रतिस्पर्धामा रहेका छन् । प्रदेश नम्बर ४ मा अपाङ्गता भएका वा अल्पसङ्ख्यक १ पदमा उम्मेदवार निर्विरोध निर्वाचित भएकाले अन्य पदमा निर्वाचन हुने भएको छ । नेपाली कांग्रेसका प्रकाश पन्थ निर्विरोध निर्वाचित भएका छन् भने सात पदमा चुनाव हुने भएको छ।
प्रदेश नम्बर ५
प्रदेश नम्बर ५ मा महिला ३ पदमा उम्मेदवारहरू निर्विरोध निर्वाचित भइसक्नु भएकाले अन्य ३, दलित १ र अपाङ्गता भएका वा अल्पसङ्ख्यक १ गरी जम्मा ५ पदमा निर्वाचन हुने भएको छ । निर्विरोध निर्वाचित हुनेमा कांग्रेसकी अनिता देवकोटा, एमालेकी कोमल ओली र एमालेकै मिना बुढा रहेका छन् ।
प्रदेश नम्बर ६ र ७
प्रदेश नम्बर ६ मा सबै पदमा निर्वाचन हुँदैछ । यहाँ एकजना पनि निर्विरोध भएनन् । प्रदेश ७ मा महिला ३ र अन्य ३ गरी ६ पदमा उम्मेदवारहरू निर्विरोध भएकाले अब दलित १ र अपाङ्गता भएका वा अल्पसंख्यक १ गरी जम्मा २ पदमा निर्वाचन हुने भएको छ ।
निर्विरोध निर्वाचित हुनेमा महिला तर्फ कांग्रेसकी तारादेवी भट्ट, एमालेकी इन्दुकेडरिया र एमालेकै कमला कुमारी ओली रहेकी छन् । अन्यमा कांगेसका बन्द्री पाण्डे, एमालेका शेरबहादुर कुवर र माओवादीका हरिाम चौधरी निर्विरोध निर्वाचित भएका छन् ।