डाकियो कांग्रेस प्रदेशसभा सांसदको बैठक
काठमाडौ : सातै प्रदेशसभाको पहिलो बैठक माघ २२ गतेसम्म बस्ने भएपछि कांग्रेसले आफ्ना प्रदेश सासंदलाई पहिलो बैठक गर्न निर्देशन गरेको छ । २४ गते हुने राष्ट्रियसभाको निर्वाचन दृष्टिगत गरी सबै प्रदेशसभाको बैठक २२ गते सम्ममा डाकिएको छ ।
कांग्रेसको केन्द्रीय नेतृत्वले प्रादेशिक स्तरमा प्रदेशसभा सासंदलाई २२ र २३ गते पहिलो बैठक गर्न निर्देशन दिएको प्रवक्ता विश्वप्रकाश शर्माले बताए । उनले भने, ‘यसका लागि केन्द्रीय प्रतिनिधिसमेत खटाइ सकिएको छ ।’ चुनावमा कमजोर परिणाम बेहोरेको कांग्रेस सातै प्रदेशमा सरकारबाहिर बस्ने निश्चित भएकाले प्रदेशसभामा समेत कांग्रेस प्रतिपक्षीको बेन्चमा बस्नेछ । शर्माले प्रतिपक्षीको भूमिका महत्वपूर्ण भएकाले कांग्रेसले सुरुदेखि नै प्रदेशसभामा कसरी जाने छलफल गर्न लागेको बताए । यसका साथै संसदीय दलको नेतादेखि प्रदेश स्तरमा प्रतिपक्षीमा पार्टीले पाउने स्थानबारे पनि २२ र २३ गते नै प्रारम्भिक छलफल हुने कांग्रेसले बताएको छ ।
‘पहिलो बैठकले नै संसदीय दलको नेता चुन्नेलगायत सबै काम गर्छ भन्ने होइन’, प्रवक्ता शर्माले भने, ‘तर हामीले सुरुदेखि नै छलफल र समझदारी कायम गर्ने भनेका छौं ।’ राष्ट्रियसभा निर्वाचनमा मधेसी दलहरूसँग अघोषित सहकार्य गरेको कांग्रेस प्रदेश २ मा गठन हुने मधेसी दलको सरकारमा सहभागी हुने नहुने निश्चित भएको छैन । प्रदेश २ बाहेक बाँकी ६ वटै प्रदेशमा वाम गठबन्धनको प्रष्ट बहुमत छ ।
राष्ट्रियसभा चुनावमा कांग्रेसलाई सघाउन मधेसी दल संघीय फोरम र राजपाले प्रदेश १ र ५ मा उम्मेदवारी दिएका छैनन् । त्यहाँ संघीय फोरम र राजपाको मत कांग्रेसका पक्षमा जाने आन्तरिक समझदारी भइसकेको नेताहरूले बताएका छन् । संघीय फोरम र राजपाले प्रदेश २ मा गठन गर्ने संयुक्त सरकारमा कांग्रेस सहभागी हुने नहुने टुंगो लागिनसकेको नेताहरू बताउँछन् ।
कांग्रेस प्रवक्ता शर्माले २४ गतेको राष्ट्रियसभा निर्वाचनपछि थप रणनीतिबारे छलफल हुने बताए । ‘अहिले पहिलो बैठक गर्न भनेका छौं’, उनले भने, ‘२४ गतेपछि बस्ने बैठकमा सरकारलगायत अन्य विषयमा छलफल हुनेछ ।’ उनका अनुसार पहिलो बैठकले संसदीय दलको नेतादेखि राष्ट्रियसभा निर्वाचनबारे छलफल गर्नेछ । प्रत्यक्ष र समानुपातिक गरी कांग्रेसबाट सातवटै प्रदेशमा १ सय १३ सांसद निर्वाचित भएका छन ।
प्रदेश १ मा कुल ९३ सांसदमध्ये कांग्रेसबाट प्रत्यक्षमा ८ र समानुपातिकमा १३ गरी २१ सांसद छन् । यो प्रदेशमा कांग्रेस संसदीय दलको नेतामा ४ जनाको चर्चा छ । प्रदेश २ मा कुल १ सय ७ सांसदमध्ये कांग्रेसबाट प्रत्यक्षमा ८ र समानुपातिकमा ११ गरी १९ सांसद छन् । यहाँ संसदीय दलको नेतामा ३ जना चर्चामा छन् । प्रदेश ३ मा कुल १ सय १० सांसदमध्ये कांग्रेसबाट प्रत्यक्षमा ७ र समानुपातिकतर्फ १४ गरी २२ सांसद छन् ।
प्रदेश ४ मा कुल ५७ सांसदमध्ये कांग्रेसबाट प्रत्यक्ष ६ र समानुपातिकतर्फ ९ गरी १५ सांसद छन् । प्रदेश ५ मा कुल ९० सांसदमध्ये कांग्रेसबाट प्रत्यक्ष ७ र समानुपातिकतर्फ १२ गरी १९ सांसद छन् । प्रदेश ६ मा कुल ४० सांसदमध्ये कांग्रेसले प्रत्यक्षतर्फ १ र समानुपातिकतर्फ ५ गरी ६ सांसद छन् । प्रदेश ७ मा कुल ५३ सांसदमध्ये कांग्रेसबाट प्रत्यक्षमा ४ र समानुपातिकतर्फ ८ गरी १२ सांसद छन् ।