प्रदेश २ को सरकार गठन : फोरम-राजपा प्याकेजमा सहमति प्रयास
काठमाडौं : प्रदेश २ मा बहुमत जितेको मधेसी गठबन्धनका संघीय फोरम र राजपा दुवैले सरकार गठनको प्रयास तीव्र पारेका छन् । गठबन्धनले प्रदेश २ मा सरकार गठन गर्न सक्ने पूर्ण बहुमत अर्थात ५४ सिट जितेका छन् ।
प्रतिनिधिसभा र प्रदेससभा निर्वाचनमा संघीय फोरम र राजपाले संयुक्त मधेसी गठबन्धन बनाएका थिए । राजपा अध्यक्ष मण्डलका एक सदस्य राजेन्द्र महतोले प्रदेश २ मा सरकार गठनबारे संघीय फोरमसँग पछिल्लो समय संवाद भइरहेको स्विकारे । उनले भने, ‘औपचारिक संवाद पनि अब चाँडै सुरु हुनेछ ।’ उनले संघीय फोरमका अध्यक्ष उपेन्द्र यादवसँग पछिल्लो समय भइरहेको अनौपचारिक संवादबारे विस्तृत जानकारी दिन चाहेनन् । उनले भने, ‘हामीबीच कुनै विवाद छैन, सबै कुरा समयमै गर्छौं ।’
संघीय फोरमका अध्यक्ष उपेन्द्र यादवले पनि महतोकोजस्तै धारणा व्यक्त गरे । उनले भने, ‘प्रदेश २ का गर्भनरले सरकार गठनका लागि आह्वान गरेपछि औपचारिक बैठक गरी दुईपक्षीय सहमतिमा प्याकेज सार्वजनिक गर्नेछौं ।’ पार्टी तहमा संघीय फोरमले आन्तरिक तयारी गरिरहेको उनको भनाइ छ । मधेसी पार्टीसंबद्ध स्रोतका अनुसार अघिल्लो सातादेखि राजपाका केही शीर्ष नेता र संघीय फोरमका अध्यक्ष यादवबीच संवाद बाक्लिएको छ ।
अघिल्लो साता राजपा नेता महतोले पनि यादवसँग अनौपचारिक संवाद गरेका थिए । त्यसयता राजपा अध्यक्ष मण्डल संयोजक महन्थ ठाकुर र यादवबीच दुईपल्ट भेटवार्ता भएको संबद्ध नेताहरूले बताए । राजपा अध्यक्ष मण्डलका अर्का सदस्य राजकिशोर यादवका अनुसार प्रदेश २ मा सरकार गठन गर्न दुवै पार्टीबीच प्याकेजमै सहमतिको प्रयास भइरहेको छ । उनले भने, ‘१÷२ दिनभित्रै हुने औपचारिक संवादले प्याकेजलाई मूर्त रूप दिनेछ ।’ फागुनको पहिलो सातासम्म संघीय फोरम-राजपा गठबन्धनले प्रदेश २ को मुख्यमन्त्री चयन गरिसक्नु पर्ने हुन्छ ।
मुख्यमन्त्रीमा संघीय फोरमका कोषाध्यक्ष विजय यादव र उपाध्यक्ष लालबाबु राउतमध्ये एक जना निश्चितजस्तै रहेको पार्टीका नेताहरूले बताएका छन् ।
अनौपचारिक संवादमा सक्रिया एक शीर्ष मधेसी नेताका अनुसार संघीय फोरम र राजपाबीच सहमतिको खाका बनाउन सुरु भइसकेको छ । प्रदेशसभामा राजपाभन्दा संघीय फोरमले ४ सिट धेरै जितेकाले प्रदेश सरकारको मुख्यमन्त्री संघीय फोरमले पाउने भएको छ । त्यसपछि सभामुखसहित प्रमुख मन्त्रालयको भागबन्डा मिलाउन बाक्लिएको अनौपचारिक संवादले खाका बनाइरहेको नेताहरू बताउँछन् । मुख्यमन्त्रीमा पार्टीका कोषाध्यक्ष विजय यादव र उपाध्यक्ष लालबाबु राउतमध्ये एक जना निश्चितजस्तै रहेको संघीय फोरमका नेताहरूले बताएका छन् । पार्टी अध्यक्ष यादव यी दुई जनामध्ये एक जनालाई मुख्यमन्त्री र अर्कोलाई संसदीय दलको नेता बनाउने पक्षमा छन् । राजपाबाट नवलकिशोर शाहलाई संसदीय दलको नेता बनाउने र जितेन्द्र सोनललाई सभामुख बनाउने तयारी भइरहेको छ ।
संवैधानिक व्यवस्थाअनुसार प्रदेशसभाका कुल सदस्य संख्याको २० प्रतिशतसम्म मन्त्रीमण्डलमा सहभागी गराउन सकिने भए पनि मुख्यमन्त्रीसहित ७ सदस्यीय मन्त्रिपरिषद्को सिफारिस प्रशासन आयोगले गरेको छ । प्रदेश २ मा १ सय ७ सदस्यीय प्रदेशसभाका झण्डै २० देखि २१ जना सांसद्ले मन्त्रिपरिषद्मा स्थान पाउन सक्छन् । मधेसी गठबन्धनले चुस्तदुरुस्त प्रदेश सरकार गठन गर्न चाहेकाले पहिलो चरणमा ७ सदस्यीय मन्त्रिमण्डलको गृहकार्य गरिरहेका छन् ।
माघ २१ गते प्रदेश २ को प्रदेशसभा बैठक बोलाइएको छ । मुख्यमन्त्री पाउने निश्चित भएकाले संघीय फोरमले पार्टी बैठक २० गते बोलाएको छ । बैठकमा मुख्य गरी प्रदेश सरकार गठनबारे छलफल हुने संघीय फोरमका अध्यक्ष यादवले बताए । उनले भने, ‘हामी पार्टीभित्र सल्लाह गरिरहेका छौं र छलफल गर्न २० गते बैठक डाकेका छौं । बैठकले मुख्यमन्त्रीसहित अन्य प्रमुख पदमा कसलाई पठाउने टुंगो लगाउने छ ।’ दुवै पार्टीभित्र प्रमुख पदसहित मन्त्रिपरिषद्मा जान निर्वाचित सासंद्हरूको दौडधुप तीव्र देखिएको छ ।
दुई वर्षअघि संविधान संशोधनका लागि ६ महिना लामो आन्दोलन गरेका दुवै मधेसी पार्टी संशोधनको मुद्दा थाँती राख्दै स्थानीय तहदेखि प्रदेश र केन्द्रको निर्वाचनमा सहभागी भएका थिए । स्थानीय तह निर्वाचनमा खासै राम्रो नतिजा नल्याए पनि प्रदेश २ मा सरकार गठन गर्ने बहुमत पाएको छ । पर्सादेखि सप्तरीसम्म ८ जिल्ला समावेश प्रदेश २ आन्दोलनताका पनि मधेसी पार्टीहरूको आधार क्षेत्र थियो ।