काठमाडौं : राजधानीको कुमारी मल्टिप्लेक्समा विशेष रौनक थियो । मल्टिप्लेक्समा चलचित्रकर्मी, मिडियाकर्मी र दर्शकको बाक्लो उपस्थिति थियोे । सहभागी कोही सेल्फी खिच्न व्यस्त थिए त कोही सेलिब्रेटीहरूसँग सामूहिक तस्बिर लिन । साँझ जति बढ्दै थियो त्यति नै बढ्दै थियो कुमारी प्रांगणमा दर्शकको भीड । त्यही भीडमा गतिशील थियो एउटा परिचित अनुहार । उनी अरू कोही नभएर नेपाली रजतपटमा राते काइँला उपनामले परिचित कलाकार सुनील थापा थिए । अवसर थियो उनी अभिनीत चलचित्र ‘शेरबहादुर’ को प्रिमियर ।
आर राजवंशीको निर्देशन र धिराज प्रोडक्सनको प्रस्तुति रहेको उक्त चलचित्रमा सुनील थापाको मुख्य अभिनय छ । यसअघिसम्म राते काइँलाको नामले चिनिएका उनी यस चलचित्रमार्फत नयाँ परिचय स्थापित हुने विश्वासमा थिए । उनको गेटअपदेखि संवादसम्मले निकै चर्चा पाएको छ । थापा दृष्टिविहीन भूपू सैनिकको भूमिकामा छन् । एउटा सन्काहा सैनिकको भूमिकामा उनी निकै जमेका छन् । कर्मा, मेनुका प्रधान र रवीन्द्र झा पनि मुख्य भूमिकामा छन् । प्रिमियरमा शेरबहादुर चलचित्रको टिमको चहलपहल निकै रोचक थियो । हास्यकलाकार मदनकृष्ण श्रेष्ठ, हरिवंश आचार्य, किरण केसी, केदार घिमिरे, दीपा श्री निरौला पनि फिल्म हेर्न हलसम्म आएका थिए । प्रिमियरमा चलचित्र ‘शेरबहादुर’ का प्रायः सबै कलाकार उपस्थित भए पनि अस्वस्थता कारण मेनुका प्रधान भने उपस्थित थिइनन् । कलाकारको भेटसँगै शेरबहादुर टिमले एक अर्काप्रति खुसी साटासाट गरे ।
चलचित्रको सुरुवातको संवाद र दृश्यले हलभरि हाँसोको फोहोरा निरन्तर गुञ्जिएको थियोे । मध्यान्तरपछि समय भने दर्शकमा पर्याप्त सन्त्रास देख्न सकिन्थ्यो । चलचित्रले सुरुदेखि अन्त्यसम्म दर्शकको उत्सुकता कायम थियो । कमेडी, सस्पेन्स र थ्रिलिङको स्वाद पस्केको उक्त चलचित्रको समाप्तिमा दर्शकको गडगडाहट ताली बज्यो ।
चलचित्र हेरेर फर्कने दर्शकले चलचित्र स्तरीय बनेको प्रतिक्रिया दिए । चलचित्र हेरेपछि कलाकार तथा निर्देशक शोभित बस्नेतले ‘फिल्म अलग धार र जीवन्त अभिनयले सशक्त’ रहेको प्रतिक्रिया दिए । एउटा घर चोरी र बदलाको विषयवस्तु उठाइएको फिल्ममा कलाकारले जीवन्त अभिनय गरेका छन् । सुपर नेचुरल इलिमेन्ट प्रयोग नगरिकनेै दर्शकको मनमा डर र त्रास पैदा गर्न चलचित्र सफल छ । धेरैजसो दर्शकले शेरबहादुरलाई ‘हरर मुभी’ पनि भन्न भ्याए । तर कमेडी र हररको प्याकेज हो शेरबहादुर । यो चलचित्र शुक्रबारबाट देशैभर प्रदर्शनमा आउँदै छ ।
प्रतिक्रिया दिनुहोस !
